რამდენიმე წუთის წინ ბერლინის საერთაშორისო კინოფესტივალის სპეციალურმა ჟიურიმ 2021 წლის გამოშვების გამარჯვებულები გამოავლინა. წლის საუკეთესო ფილმად რუმინელი რეჟისორის რადუ ჟუდეს კინოსურათი Bad Luck Banging or Loony Porn დასახელდა და ოქროს დათვი გადაეცა.

დანარჩენ ნომინაციებში ჯილდოები შემდეგნაირად გადანაწილდა:

  • ჟიურის გრან პრი — Wheel of Fortune and Fantas, რიუსუკე ჰამაგუში;
  • საუკეთესო რეჟისორი (ვერცხლის დათვი) — Natural Light, დენის ნაგი;
  • საუკეთესო მსახიობი — მარენ ეგერტი, I'm Your Man;
  • საუკეთესო სცენარი — Introduction, ჰონგ სან სუ.

აღსანიშნავია, რომ წელს საკონკურსო პროგრამაში ქართული ფილმიც იყო წარმოდგენილი: ალექსანდრე კობერიძის რას ვხედავთ, როცა ცას ვუყურებთ?

თითქმის 30-წლიანი პაუზის შემდეგ, როცა 1993 წელს თემურ ბაბლუანის ფილმს უძინართა მზე ვერცხლის დათვი გადაეცა, ბერლინის საერთაშორისო კინოფესტივალის მთავარ საკონკურსო პროგრამაში სრულმეტრაჟიანი ქართული ფილმი წელს პირველად მოხვდა.

მართალია, ალექსანდრე კობერიძის ნამუშევარი ჟიურიმ ჯილდოთი არ აღნიშნა, თუმცა 15 ფინალისტ კანდიდატს შორის მოხვედრა მაინც დიდი წარმატებაა თანამედროვე ქართული კინოსთვის.

ბერლინალეს 71-ე ფესტივალი პანდემიის გამო დისტანციურ რეჟიმში გაიმართა.