გერმანიის დედაქალაქში კინოფესტივალი წელს 67-ედ გაიხსნა. მთავარი ჯილდოს მოსაპოვებლად წელს 18 ფილმი იბრძვის, ჟიურის თავმჯდომარე კი ჰოლანდიელი რეჟისორი პოლ ვერჰოვენია.

ჟიურის ერთ-ერთი წევრია მექსიკელი რეჟისორი დიეგო ლუნა, რომელსაც ჟურნალისტმა აზრი ჰკითხა ტრამპის მიერ აშშ-მექსიკის საზღვარზე კედლის მშენებლობის იდეაზე. დიეგო ლუნამ უპასუხა, რომ ჯერ კიდევ ვერ იჯერებს, რომ ტრამპმა ასეთი ბრძანება გასცა.

დისკუსიას გამოეხმაურა ამრიკელი მსახიობი მეგი ჯილენჰოლიც, რომელმაც მექსიკელებს ბოდიში მოუხადა და თქვა, რომ ამერიკა სრულად იღებს პასუხისმგებლობას საკუთარ თავზე.

ფესტივალი წელს ფრანგი პროდიუსერისა და რეჟისორის, ეტიენ კომანის ფილმით, ჯანგოთი გაიხსნა, რომელიც ბოშური წარმოშობის ცნობილ ჯაზ-გიტარისტზე, ჯანგო რეინჰარდტზე მოგვითხრობს. პარიზის ოკუპაციის შემდეგ მუსიკოსი იძულებული გახდა, ქვეყანა დაეტოვებინა.

წელს ბერლინის საერთაშორისო კინოფესტივალზე საქართველო სამი მხატვრული და ერთი ანიმაციური ფილმით მონაწილეობს. ესენია: რეზო გიგინეიშვილის მძევლები, ნანა ექვთიმიშვილის ჩემი ბედნიერი ოჯახი, რატი ონელის მზის ქალაქი და ნათია ნიკოლაიშვილის ანიმაცია ლილე.

ბერლინალე საკუთარ რჩეულებს 19 თებერვალს გამოავლენს.