ჯანდაცვის მინისტრის მოადგილის, თამარ გაბუნიას განცხადებით, გუშინდელი გაუგებრობა Covax-ის პლატფორმასთან "ამოწურულია". ამის შესახებ მან საკოორდინაციო საბჭოს წევრების ბრიფინგზე ისაუბრა.

"ყველა სახელმწიფოს, მათ შორის, ჩვენც გვაქვს უფლება გამოვხატოთ ჩვენი უკმაყოფილება გარკვეულ ასპექტებთან დაკავშირებით. ეს კომუნიკაცია მოხდება Covax-თან, მის პარტნიორებთანაც. ეს არის სამუშაო პროცესი. ჩვენ ვფიქრობთ, რომ გუშინდელი გაუგებრობა ამოწურულია და თანამშრომლობა გაგრძელდება მიმდინარე რეჟიმში", — თქვა მან.

1-ელ მარტს ჯანდაცვის მინისტრმა, ეკატერინე ტიკარაძემ განაცხადა, რომ არ არის გამორიცხული, საქართველომ Covax პლატფორმას უჩივლოს, ვინაიდან რეპუტაციულ რისკებზეცაა საუბარი. ასე უპასუხა მან Covax-ს განმარტებას იმაზე, თუ რატომ ვერ მიიღო საქართველომ ვაქცინა. Covax-ის ცნობით, თებერვლის ბოლოს ნაადრევი გზავნილები იმ ქვეყნებში განხორციელდა, რომლებმაც კრიტერიუმები უკვე დააკმაყოფილეს.