ევროპული საბჭოს პრეზიდენტის, შარლ მიშელის განცხადებით, საქართველოში არსებული პოლარიზაცია უნდა დასრულდეს. პრემიერმინისტრ ირაკლი ღარიბაშვილთან გამართული შეხვედრის შემდეგ მან მხარეებს დიალოგისკენ მოუწოდა.

"მე მაწუხებს ძალიან ის გაღრმავებული პოლიტიკური კრიზისი, რომელიც საქართველოში არსებობს. არსებული პოლარიზაცია და კრიზისი იმაზე მეტყვლებს, რომ საქართველომ მოიპოვა წლების განმავლობაში ეს დემოკრატია და მიღწევები და ეს ყველაფერი თქვენი პრემიერმინისტრობის პერიოდში, თქვენი კოლეგებისა და ოპოზიციის ლიდერების ძალისხმევით უნდა გამოსწორდეს და დასრულდეს. ნებისმიერი ქვეყნის მთავრობამ, უნდა გამოიჩინოს ლიდერული თვისებები და ასევე, გამოწვევებს გაუსწოროს თვალი და საქართველოს ინტერესების შესაბამისად იმოქმედოს.

მე ყველა მხარეს მოვუწოდებ, მოხდეს დეესკალაცია და გაერთიანდეს ძალები იმისათვის, რომ პოლიტიკური დიალოგი შედგეს", — განაცხადა მიშელმა.

ევროპული საბჭოს პრეზიდენტმა პირველ მარტს სამუშაო შეხვედრები, ასევე, გამართა საქართველოს პრეზიდენტ სალომე ზურაბიშვილთან. დაგეგმილია შეხვედრები პარლამენტის თავმჯდომარესთან და სხვადასხვა პარტიის წევრებთან. ის დღეს საოკუპაციო ხაზთანაც იმყოფებოდა.

ევროპული საბჭოს პრეზიდენტი საქართველოში პოლიტიკური კრიზისის ფონზე ჩამოვიდა. თითქმის ერთი კვირის წინ, ნაციონალური მოძრაობის ლიდერი ნიკა მელია დააკავეს, რასაც ევროპელი და ამერიკელი პარტნიორების მხრიდან კრიტიკა და შეშფოთება მოჰყვა.

24 თებერვალს 6-მა ევროპარლამენტარმა მიშელს წერილით მიმართა და საქართველოში ვიზიტამდე, მიმდინარე ბოლოდროინდელ მოვლენებზე რეაგირება მოსთხოვა.

როგორც ერთობლივ წერილშია აღნიშნული, ნაციონალური მოძრაობის ლიდერის, ნიკა მელიას დაკავების შემდეგ, ქართულ ოცნებასა და ოპოზიციას შორის დაპირისპირებამ სახიფათო დონეს მიაღწია. ისინი მოუწოდებდნენ მიშელს, ვიზიტი გამოიყენოს იმისთვის, რომ მხარეებს დიალოგისკენ მოუწოდოს.