ევროპული საბჭოს პრეზიდენტის საბჭოს საქართველოში ვიზიტამდე ექვსი ევროპარლამენტარი შარლ მიშელს მიმართავს, რომ საქართველოში მიმდინარე ბოლოდროინდელ მოვლენებზე რეაგირება იქონიოს.

როგორც ერთობლივ წერილშია აღნიშნული, ნაციონალური მოძრაობის ლიდერის, ნიკა მელიას დაკავების შემდეგ, ქართულ ოცნებასა და ოპოზიციას შორის დაპირისპირებამ სახიფათო დონეს მიაღწია. ისინი მოუწოდებენ მიშელს, რომ თავისი ვიზიტი იმისთვის გამოიყენოს, რომ მხარეებს დიალოგისკენ მოუწოდოს.

გთავაზობთ წერილს სრულად:

ევროპული საბჭოს პრეზიდენტს, შარლ მიშელს

ძვირფასო პრეზიდენტო შარლ მიშელ, რაკი საქართველოში თქვენი მეტად დროული ვიზიტი ახლოვდება, ჩვენ, ქვემოთ აღნიშნული ევროპული პარლამენტის წევრები გწერთ, რათა გამოვხატოთ ჩვენი მწუხარება ჩვენს პარტნიორ საქართველოში მიმდინარე პოლიტიკური კრიზისის გამო, რომელიც კიდევ უფრო მწვავდება.

როგორც ასოცირების ხელშეკრულების იმპლემენტაციასთან დაკავშირებით ევროპული პარლამენტის 2020 წლის 16 სექტემბრის რეზოლუციაშია ნათქვამი, 2020 წლის ოქტომბრის არჩევნებს საქართველოს დემოკრატიული კურსი უნდა დაედასტურებინა. ამის ნაცვლად, არჩეული წევრების ⅓ უარს აცხადებს პარლამენტში შესვლაზე, მიზეზად კი გაყალბებას ასახელებს. ადგილობრივი არასამთავრობო ორგანიზაციის, ISFED-ის დასკვნით, საარჩევნო უბნების 8 პროცენტზე უზუსტობა დაფიქსირდა, სხვა დარღვევებთან ერთად. მას შემდეგ, რაც ენმ-ის ოფისში ლიდერი ნიკა მელია ცრემლსადენი გაზის გამოყენებით დააკავეს, ქართულ ოცნებასა და ოპოზიციას შორის დაპირისპირებამ სახიფათო დონეს მიაღწია. ევროკავშირი თვალს ვერ დახუჭავს ძალადობაზე, რევანშიზმსა და ომის ზღვარზე ბალანსირების პოლიტიკაზე, რომლებიც დომინანტ ტრენდებად იქცა. პოლიტიკური პოლარიზაცია და დაძაბულობა საზოგადოებასა და სახელმწიფოს სტაბილურობას საფრთხეს უქმნის. გარდა ამისა, პოლიტიკურმა კრიზისმა შეიძლება საქართველოს ხელი შეუშალოს, მიაღწიოს ასოცირების შეთანხმების ფარგლებში დასახულ მიზნებს. ჩვენ გთხოვთ, რომ თქვენი ვიზიტი იმისთვის გამოიყენოთ, რომ ქართულ პოლიტიკურ ძალებს დიალოგის განახლებისკენ მოუწოდოთ, რამაც შეიძლება კონკრეტულ ურთიერთშეთანხმების მემორანდუმამდე მიგვიყვანოს. სიჩქარე და კეთილი ნება, რომლითაც ქართული პოლიტიკური ელიტა მრავალმხრივ დიალოგში ჩაერთვება, აჩვენებს, რამდენად ერთგულობს საქართველო საკუთარ ევროპულ მისწრაფებებს.

ჩვენ გვჯერა, რომ ამ პროცესში ქართულ სამოქალაქო სექტორს მნიშვნელოვანი პოზიტიური როლის თამაში შეუძლია. შესაბამისად, მოგიწოდებთ, რომ მათ თქვენი ვიზიტის დროს აქტიურად ეთანამშრომლოთ. იმედი გვაქვს, რომ ამ გზავნილს ჩვენს პარტნიორებსაც გადასცემთ და დაარწმუნებთ, რომ ევროპული საბჭო მხარს უჭერს ქართველი ხალხის დაცულ და წარმატებულ მომავალს. ჩვენ მზად ვართ, რომ მედიაცია გავუწიოთ ამ პროცესს, რასაც საქართველოში ევროკავშირის დელეგაციის წევრები და სხვა დიპლომატები აქამდეც დაუღალავად აკეთებდნენ.

განცხადებას ხელს აწერენ: პეტრას აუსტრევიჩიუსი, ანდრიუს კუბილიუსი, მარკეტა გრეგოროვა, ვიტოლდ ვაშიკოვსკი, ვიოლა ფონ კრამონი, მაიკლ გალერი.