ჯანდაცვის მინისტრის მოადგილის, თამარ გაბუნიას განცხადებით, კოვაქს პლატფორმა გააკეთებს განმარტებებას მისი განცხადების ინტერპრეტაციის თაობაზე.

"დღეს გაჟღერდა ინფორმაცია ინტერპრესნიუსის საშუალებით, რომ თითქოს საქართველომ არ დააკმაყოფილა და ვერ დააკმაყოფილა მზაობის მოთხოვნები. ჩვენ ნახევარი საათის წინ მივმართეთ კოვაქსს და ვთხოვეთ განმარტება იმ განცხადების, რომელიც გაჟღერდა ინტერპრესნიუსის საშუალებით, რადგან იმ წერილებში, რომელიც ჩვენ გვაქვს მიღებული კოვაქსისგან და ეს არის 22 თებრვლის წერილი, მიზეზი გადავადების არის ცალსახად მითითებული Pfizer-ის მიერ დამატებითი მოთხოვნის დაყენება, რაც სრულიად არ უკავშირდება ქვეყნის მზაობას და ქვეყნის მზაობა, რომელიც შეფასდა ჯანმრთელობის მსოფლიო ორგანიზაციის, გავის ექსპერტების და ასევე, კოვაქსის ექსპერტების მიერ არის სრულ შესაბამისობაში იმ კრიტერიუმებთან, რომელიც დაისვა Pfizer-ის ულტრაცივი ჯაჭვის მოთხოვნის მისაღებად", — განაცხადა გაბუნიამ.

InterpressNews-ის ცნობით, Covax პლატფორმამ მათი კითხვის პასუხად განმარტა, რატომ ვერ მიიღო საქართველომ Pfizer-ის ვაქცინა თებერვალში. Covax-ის განცხადებით, თებერვლის ბოლოს ნაადრევი გზავნილები იმ ქვეყნებში განხორციელდა, რომლებმაც კრიტერიუმები უკვე დააკმაყოფილეს.