პრემიერმინისტრის, ირაკლი ღარიბაშვილის თქმით მთავრობა და თითოეული უწყება ვაქცინის მისაღებად ყველაფერს აკეთებს.

"მართალია, მსოფლიოში ვაქცინის დეფიციტმა გაართულა ჩვენი მოსახლეობის ვაქცინაციის დაწყება, მაგრამ, მერწმუნეთ, ჩვენი მთავრობა, თითოეული უწყება ყველაფერს აკეთებს, რომ ქვეყანამ პირველი დოზები რაც შეიძლება მალე მიიღოს", — განაცხადა პრემიერმინისტრმა.

მისი თქმით, პანდემიის შედეგად მსოფლიოში უძლიერესი ეკონომიკის ქვეყნები აღმოჩნდნენ დარტყმის ქვეშ, გამონაკლისი არც საქართველო იყო და პანდემია ყველაფერს შეეხო.

„ერთი წელი გავიდა საქართველოში ახალი კორონავირუსის პირველი შემთხვევის დაფიქსირებიდან. ეს ერთი წელია, მთელი მსოფლიო სრულიად განსხვავებულ, რთულ რეჟიმში ცხოვრობს. უმძიმესი დარტყმის ქვეშ აღმოჩნდნენ მსოფლიოში ყველაზე ძლიერი ეკონომიკის მქონე ქვეყნები. გამონაკლისი არც საქართველო აღმოჩნდა. პანდემია შეეხო ყველას და ყველაფერს", — თქვა ღარიბაშვილმა.

ჯანდაცვის სამინისტროსა და დაავადებთა კონტროლის ცენტრის წარმომადგენლები აცხადებდნენ, რომ საქართველო კორონავირუსის წინააღმდეგ ვაქცინის პირველ დოზებს თებერვლის ბოლოს მიიღებდა. თუმცა 24 თებერვალს სამინისტროში აღნიშნეს, რომ ვაქცინის მირების ზუსტი თარიღი ჯერ უცნობია.

ჯანდაცვის მინისტრის მოადგილე, თამარ გაბუნია ამბობს, რომ დაგვიანება Pfizer-ის მხრიდან დამატებით მოთხოვნებს უკავშირდება.

პირველი ვაქცინა, რომელიც საქართველოში უნდა შემოვიდეს Pfizer-ია. ჯანდაცვის სამინისტროში აცხადებდნენ, რომ თებერვლის ბოლოს საქართველო 29 250 დოზა Pfizer-ის ვაქცინას მიიღებდა, რომელიც 14 500-მდე სამედიცინო პერსონალზე იქნებოდა გათვლილი. ამასთან, მარტის დასაწყისში COVAX პლატფორმის ფარგლებში უნდა შემოვიდეს AstraZeneca-ს 315 000 დოზაც. ხოლო AstraZeneca-სთან პირდაპირი მოლაპარაკებების საფუძველზე, გაბუნიას თქმით, საქართველო 150 ათას დოზა ვაქცინას მიიღებდა.

გაიგეთ მეტი: