ვინსენტ ვან გოგის ტილო, რომელიც საუკუნეზე მეტი ხნის განმავლობაში ერთ-ერთი ფრანგული ოჯახის კერძო კოლექციის საკუთრება იყო, პირველად გაიყიდება აუქციონზე პარიზში. წინასწარი შეფასებით, მარტში გასამართავ ღონისძიებაზე ნიდერლანდელი მხატვრის ნამუშევრის ღირებულება $6 მილიონიდან $9,7 მილიონამდე განისაზღვრება.

ფერწერული ნამუშევარი საჯარო სივრცეში არასდროს გამოფენილა, თუმცა მისი არსებობა ხელოვნებათმცოდნეებისთვის ცნობილი იყო. იგი სხვადასხვა წელს შედგენილ 7 კატალოგში შედის; ამასთან, შექმნილია რამდენიმე რეპროდუქციაც, რომელთა უმეტესობა შავ-თეთრია.

ნახატი, სახელწოდებით Scène de rue à Montmartre ("მონმარტრის ქუჩის სცენა") ვან გოგმა 1887 წლის გაზაფხულზე შექმნა, როცა დროებით პარიზში, ძმასთან ერთად ცხოვრება მოუწია. ხელოვანი მონმარტრში ურბანული და სოფლისთვის დამახასიათებელი პეიზაჟების შერწყმით მოხიბლულა, სადაც "წისქვილები კაბარეებს ენაცვლებიან".

ნამუშევარში ვან გოგის ახალი ქალაქით მოხიბვლა და პარიზელი კოლეგების — ფრანგი იმპრესიონისტებისა და ავანგარდიზმის მიმდევრების — გაცნობით მიღებული შთაბეჭდილებაა ასახული. როგორც ხელოვნებათმცოდნეები აღნიშნავენ, მოგვიანებით, სწორედ ეს გახდა მისი პალიტრის გადასხვაფერების მიზეზი. თუკი მანამდე, ნიდერლანდებში შექმნილ მის ნამუშევრებში მუქი ტონები ჭარბობდა, პარიზში ისინი მრავალფეროვნებამ ჩაანაცვლა. პარიზში გატარებულმა გარდამტეხმა წლებმა მისცა დასაბამი მხატვრის განუმეორებელი ტექნიკის ჩამოყალიბებასაც.

ფოტო: Reuters

"მონმარტრში ცხოვრების პერიოდში ვან გოგის მიერ შექმნილი ნამუშევრების ძალიან მცირე ნაწილი კვლავ რჩება კერძო მესაკუთრეების კოლექციებში, თუმცა, სერიის ნახატების უმეტესობა ახლა მსოფლიოს სხვადასხვა ცნობილ მუზეუმში ინახება", — ამბობენ სააუქციონო კომპანია Sotheby's-ის თანამშრომლები, ორელი ვანდევურდი და ეტიენ ელმანი.