ნაციონალური მოძრაობის ოფისში მისულმა პოლიციამ ნიკა მელიასა და პარტიის ოფისში შეკრებილ ადამიანებს ნახევარსაათიანი ვადა მისცა, რათა შენობა დაცალონ.

"ნიკანორ მელიას საქმეზე გაცემულია საქალაქო სასამართლოს განჩინება აღკვეთის ღონისძიების სახით პატიმრობის გამოყენების შესახებ. გთხოვთ, პოლიციას ხელი არ შეუშალოთ განჩინების აღსრულებაში. ასევე, მოგიწოდებთ მოქალაქეებს, რომ დატოვოთ შენობა, დაიცვათ საზოგადოებრივი წესრიგი და გამოხვიდეთ შენობის გასასვლელების მხრიდან. მოგიწოდეთ, რომ დაიცვათ საზოგადოებრივი წესრიგი, პოლიციას არ გაუწიოთ წინააღმდეგობა. წინააღმდეგობის გამწევ პირთა მიმართ გამოყენებული იქნება იძულებითი ხასიათის ღონისძიებები. შენობის დასატოვებლად გეძლევათ გონივრული ვადა. ნახევარი საათის განმავლობაში, გთხოვთ, გაითვალისწინოთ, რომ დაცალოთ შენობა და არ გაუწიოთ პოლიციას წინააღმდეგობა", — განაცხადა ადგილზე მისულმა პოლიციამ გაფრთხილების სახით.

ნაციონალური მოძრაობის ოფისში, ნიკა მელიას დასაკავებლად, დაახლოებით 07:30-ზე სპეცდანიშნულების რაზმი მივიდა. როგორც ადგილზე მყოფი On.ge-ს ჟურნალისტი გვატყობინებს, იქ სამართალდამცავი უწყების რამდენიმე ასეული თანამშრომელია და ისინი მთელ პერიმეტრზე არიან განლაგებულნი.