გამომცემლობამ არტანუჯი მეგრული ენის სახელმძღვანელო — ვისწავლოთ მეგრული — გამოსცა. თვითმასწავლებლის ავტორი ენათმეცნიერი ნათია ფონიავაა.

გამოცემის მნიშვნელობაზე საუბრობს არტანუჯის დამფუძნებელი, ისტორიკოსი ბუბა კუდავა. Euronews Georgia-ს ეთერში მან აღნიშნა, რომ ქართველური ენები "საერთო ქართული მემკვიდრეობა და საგანძურია, რომლითაც ყველანი უნდა ვამაყობდეთ, მიუხედავად ჩვენი კუთხური წარმომავლობისა".

კუდავამ ასევე აღნიშნა, რომ წიგნი მათთვისაცაა განკუთვნილი, ვინც იაზრებს, რომ ქართველური ენები არაერთგვაროვანი ფაქტორების გათვალისწინებით გაქრობის საფრთხის წინაშე აღმოჩნდა.

"ენის შენარჩუნებას სჭირდება სამი თაობის ერთმანეთთან უწყვეტი საუბარი", — ამბობს კუდავა პირველი არხის ეთერში, — "დღევანდელ რეალობაში ერთმანეთთან მხოლოდ უფროსი ორი თაობა საუბრობს; მესამე თაობა კი თითქმის არ საუბრობს, უშუალოდ ამ კუთხეებშიც კი".

თვითმასწავლებელს თან ერთვის აუდიოვერსიაც, რომლის შექმნაშიც საქართველოს საზოგადოებრივი მაუწყებელი მონაწილეობდა.

როგორც ცნობილია, პროექტი მხოლოდ მეგრული ენის სახელმძღვანელოს გამოცემას არ მოიაზრებს და მომავალში იგეგმება სხვა ქართველური ენების — სვანურის და ლაზურის — თვითმასწავლებლების შედგენა. მომდევნო სახელმძღვანელო სვანური ენის იქნება, რომლის ავტორიც ფილოლოგიის დოქტორი, მედეა საღლიანია.