ოცნების პრემიერმინისტრ ირაკლი კობახიძის განცხადებით, თბილისის მერ კახა კალაძეს "წინასწარი მონაცემებით" ბაგა-ბაღების სააგენტოში კორუფციასთან შემხებლობა არ ჰქონია.

"მე მაქვს ინფორმაცია, რომ კახი კალაძეს არანაირი შემხებლობა არ ჰქონია ამ ფაქტთან მიმართებით. გამოძიება რასაც ავლენს წინასწარი მონაცემებით, არავითარი შემხებლობა არ ჰქონია კახი კალაძეს ამ საქმესთან… შეიძლება კონკრეტული დანაშაულები გამოვლინდეს, მაგალითად, კონკრეტულ სახელმწიფო საწარმოში, რაც შეიძლება იმ პერიოდსაც უკავშირდებოდეს, როცა მე ვიყავი პრემიერმინისტრი, მაგრამ შეიძლება, მე არ მცოდნოდა ამასთან დაკავშირებით", — განაცხადა ირაკლი კობახიძემ.

ამ საკითხზე ჟურნლაისტებმა კომენტარის გაკეთაბა კახა კალაძესაც სთხოვეს. თბილისის მერმა განაცხადა, რომ ის არაფერ შუაშია, როცა ის მივიდა მერიაში, გვანცელაძე უკვე იქ მუშაობდა.

"მე რომ მერიაში მივედი კახა გვანცელაძე დამხვდა, იქ მუშაობდა. რას ნიშნავს ჩემი კადრი?! მე არ მყავს კადრები. როდესაც ადამიანებს ვნიშნავ სხვადასხვა თანამდებობებზე, გამოვდივარ მათი საქმიანობის შეფასებით, პროფესიონალიზმით და ა.შ. მე როდესაც გავხდი 2017 წელს დედაქალის მერიმ კახა გვანცელაძე მუშაობდა მუნიციპალიტეტის რომელიღაც სამსახურში.
ვინც დანაშაული ჩაიდინა, ის აგებს პასუხს კანონის წინაშე. მე არ ვარ მაკონტროლებელი. მაკონტროლებელი არიან შესაბამისი უწყებები. ძალიან სასაცილოები ხართ. 30 000-მდე თანამშრომელია მუნიციპალიტეტში, შესაბამისად, თუ ვინმე ჩადის დანაშაულს, კეთილი უნდა ინებოს და პასუხი აგოს.

მოდი უდანაშაულობის პრეზუმფციას ნუ დავარღვევთ. მიმდინარეობს გამოძიება და დაველოდოთ", — განაცხადა თბილისის მერმა, კახა კალაძემ ბაგა-ბაღების მართვის სააგენტოს ყოფილი დირექტორის, კახა გვანცელაძის საქმეზე.

თბილისის მერიის საბავშვო ბაგა-ბაღების მართვის სააგენტოს ყოფილი დირექტორი კახა გვანცელაძე ფიგურირებს სუს-ის ყოფილი უფროსი, გრიგოლ ლილუაშვილის საქმეში. მას ბრალი დაუსწრებლად უკვე წარუდგიბეს.