თურქეთის ხელისუფლების განცხადებით, მათ შობისა და ახალი წლის ღონისძიებებზე დაგეგმილი თავდასხმები შეაჩერეს, მას შემდეგ რაც ე.წ. "ისლამური სახელმწიფოს" ჯგუფის 100-ზე მეტი ეჭვმიტანილი წევრი დააკავეს. ამის შესახებ ინფორმაციას BBC ავრცელებს.

ქალაქის მთავარი პროკურორის თქმით, სტამბოლში მასშტაბური რეიდები 124 მისამართზე ჩატარდა, რის შედეგადაც ამოღებულია ცეცხლსასროლი იარაღი, საბრძოლო მასალა და დოკუმენტები.

ოფიციალური პირების განცხადებით, "ისლამური სახელმწიფოს" მხარდამჭერები ამ კვირაში თურქეთის მასშტაბით თავდასხმებს აქტიურად გეგმავდნენ, განსაკუთრებით მათ წინააღმდეგ, ვინც მუსლიმი არ არის.

პოლიციამ 115 ეჭვმიტანილი დააკავა, თუმცა განცხადებაში ნათქვამია, რომ კიდევ 22 პირის ძებნა გრძელდება.

პროკურატურის ცნობით, ეჭვმიტანილებს კავშირი ჰქონდათ "ისლამური სახელმწიფოს" ოპერატორებთან თურქეთის ფარგლებს გარეთ.

თურქეთის უსაფრთხოების სამსახურები რეგულარულად ახორციელებენ ოპერაციებს "ისლამურ სახელმწიფოსთან" შესაძლო კავშირების მქონე პირების წინააღმდეგ.

ცნობისთვის, თურქეთს 900 კილომეტრიანი საზღვარი აქვს სირიასთან, სადაც დაჯგუფება "ისლამური სახელმწიფო" ქვეყნის გარკვეულ ნაწილებში კვლავ მოქმედებს.

სირიის პრეზიდენტმა აჰმედ ალ-შარაამ, რომელსაც თურქეთის მთავრობასთან მჭიდრო კავშირები აქვს, პირობა დადო, რომ შეერთებულ შტატებთან და ევროპასთან ერთად ამ კუთხით იმუშავებს.