სომხეთის ეკონომიკის მინისტრმა, გევორგ პაპოიანმა "რადიო თავისუფლებასთან" საუბრისას განაცხადა, რომ აზერბაიჯანიდან სომხეთში ნავთობპროდუქტების საქართველოს გავლით ტრანზიტისთვის ქართული მხარის მიერ დასახელებული ფასი "არაკონკურენტული" და "მაღალია".

"ერთ მხარეს არის საქართველოს რკინიგზის კომპანია, მეორე მხარეს კი მარცვლეულის ან ბენზინის იმპორტიორი კომპანიები. ბუნებრივია, მათ უნდა აწარმოონ მოლაპარაკება და იპოვონ საუკეთესო ვარიანტი", — თქვა პაპოიანმა.

18 დეკემბერს სომხეთის პრემიერმინისტრმა, ნიკოლ ფაშინიანმა აღნიშნა: "თუ ეს საკითხები არ მოგვარდება, იმედი მაქვს, რომ ბიზნესები მოძებნიან ალტერნატიულ გზებს იმპორტისა და ექსპორტის უზრუნველსაყოფად, თუ ეს გარიგებები კვლავ საინტერესო იქნება".

ცნობისთვის, 18 დეკემბერს ისტორიაში პირველად, აზერბაიჯანმა საქართველოს გავლით სომხეთს ბენზინის პარტია გაუგზავნა. აზერბაიჯანული პროსამთავრობო მედიასაშუალება APA-ის ცნობით სომხეთის მიმართულებით SOCAR-ის წარმოების AI-95 ტიპის ბენზინით დატვირთული 22 სარკინიგზო ვაგონი გაიგზავნა.