რუსეთუს მიერ ოკუპირებული სამხრეთ ოსეთის ე.წ პრეზიდენტმა, ალან გაგლოევმა განაცხადა, რომ ამ რთულ პერიოდში რესპუბლიკაში ვითარების დესტაბილიზაციის საშუალებას არავის მისცემს. აღნიშნული განცხადება მან საქართველოს მოქალაქე აქტივისტის, თამარ მეარაყიშვილის ჯაშუშობის ბრალდებით დაკავებაზე საუბრისას გააკეთა. ამის შესახებ ინფორმაციას ადგილობრივი მედია ავრცელებს.

გაგლოევმა აღნიშნა, რომ მეარაყიშვილის ჩხრეკისას ამოღებულია მტკიცებულებები, რომლებიც მის წინააღმდეგ შეიძლება გამოიყენოს.

"მიმდინარეობს გამოძიება და ამ საკითხთან დაკავშირებული ყველა დეტალი საჯაროდ არის ცნობილი. არსებობს ფაქტები და დოკუმენტები, რომლებიც ადასტურებს წაყენებულ ბრალდებებში მის მონაწილეობას ადასტურებს," — განაცხადა გაგლოევმა.

მან ხაზი გაუსვა, რომ არ დაუშვებს ვინმემ ჩაშალოს ბავშვების დღესასწაული ცენტრალურ მოედანზე, სადაც მთავარი საახალწლო ნაძვის ხეა განთავსებული, და რომ პროვოკატორები კანონის სრული სიმკაცრით აგებენ პასუხს.

"თუ ვინმეს სურს ბავშვებს ახალი წელი გაუფუჭოს, წავიდეს და თბილისის ცენტრში გააპროტესტოს", — განაცხადა ე.წ პრეზიდენტმა.

გაგლოევმა აღნიშნა, რომ მეარაყიშვილს წარსულშიც არაერთხელ ყოფილა სისხლისსამართლებრივი დევნის ობიექტი, თუმცა სასამართლოში ყოველთვის იმარჯვებდა.

"ის ხელისუფლების მიმართ მკაცრ განცხადებებს აკეთებდა, შეურაცხმყოფელ გამონათქვამებს იყენებდა, რაც სისხლის სამართლის დანაშაულია. თუმცა მასზე ზეწოლის განზრახვა არც ყოფილა და არც არის. ნებისმიერ სხვა ქვეყანაში ის იქნებოდა გასამართლებული," — განაცხადა გაგლოევმა.

რაც შეეხება ე.წ სამხრეთ ოსეთის მოქალაქეობის მიღებაზე მის განცხადებებს, რომელთა შესახებაც მეარაყიშვილი ვიდეომიმართვებში ხშირად საუბრობდა, გაგლოევის თქმით, მისთვის მოქალაქეობაზე უარი არ უთქვამთ.

მისივე განცხადებით, ვინაიდან იგი საქართველოს მოქალაქეა, მას სთხოვეს უარი ეთქვა საქართველოს მოქალაქეობაზე სამხრეთ ოსეთის მოქალაქეობის მიღების სანაცვლოდ, თუმცა მან ამაზე უარი განაცხადა.

ცნობისთვის, ოკუპირებულ ცხინვალში ქართველი სამოქალაქო აქტივისტი თამარ მეარაყიშვილი 22 დეკებერს დააკავეს. მას 2-თვიანი წინასწარი პატიმრობა უკვე შეუფარდეს. ქართველია აქტივისტი პროტესტის ნიშნად შიმშილობს.