ჯანმრთელობის პრობლემას, როგორი უმნიშვნელოც არ უნდა იყოს ის, ჩვენს კეთილდღეობაზე დიდი გავლენის მოხდენა შეუძლია. ზოგჯერ ის მთლიანად ცვლის ჩვენს ცხოვრების ტემპს, ხოლო ერთი შეხედვით მსუბუქი პრობლემები, როგორებიცაა სხეულის რაიმე ნაწილის ტკივილი ან თუნდაც საჭმლის მომნელებელი სისტემის აშლილობა, სტრესსა და უხასიათობას იწვევს. თავის მხრივ, სტრესი ჯანმრთელობის სხვადასხვა პრობლემას ამწვავებს, მათ შორის, შეიძლება გაციების ან სხვა კიდევ უფრო სერიოზული დაავადების გამომწვევიც კი გახდეს.

ამ ყველაფერთან გამკლავებასა და დაავადებების პრევენციაში კი ჯანმრთელობაზე ზრუნვის ჩვევად გადაქცევა დაგვეხმარება. 2021 წელს, სამედიცინო ცენტრ ციტოს მთავარი გზავნილია "აქციეთ ჯანმრთელობაზე ზრუნვა ჩვევად".

რას ვგულისხმობთ ჯანმრთელობაზე ზრუნვაში?

პირობითად, ეს პროცესი შეგვიძლია დავყოთ ორ ნაწილად: პრევენციულ-პროფილაქტიკურ და სამკურნალო ფაზებად.

პროფილაქტიკის ეტაპი მოიცავს გეგმიურ ვიზიტს სამედიცინო ცენტრში, სადაც თერაპევტი სქესის, ასაკის და ანამნეზის მიხედვით ნიშნავს ამბულატორიულ და ლაბორატორიულ კვლევებს.

დღეს რამდენიმე მათგანზე გავამახვილებთ ყურადღებას.

ყველაზე გავრცელებული პროფილაქტიკური კვლევებია სისხლისა და შარდის საერთო ანალიზები, რომელიც ექიმ-თერაპევტს აწვდის ინფორმაციას პაციენტის ჯანმრთელობის ზოგადი მდგომარეობის შესახებ. კვლევის შედეგების მიხედვით ექიმი-თერაპევტი პაციენტის ორგანიზმში მიმდინარე პროცესებს აკვირდება და განსაზღვრავს შემდგომი კვლევების საჭიროებას.

ნებისმიერი ასაკისა და სქესის ჯანმრთელმა ადამიანმა, აღნიშნული კვლევები წელიწადში ორჯერ უნდა ჩაიტაროს და კვლევის შედეგის წაკითხვა ექიმს მიანდოს, რათა არ მოხდეს პაციენტის მიერ შედეგის არასწორი ინტერპრეტირება.

არანაკლებ მნიშვნელოვანია ანალიზებისთვის მომზადების ეტაპი.

მაგალითად, მთელი რიგი კვლევებისთვის მნიშვნელოვანი ფაქტორია უზმოდ ყოფნა. საკვები და სასმელი შეიცავს ვიტამინებს და მაკრონუტრიენტებს, რომელთაც გავლენის მოხდენა შეუძლიათ სხვადასხვა საკვლევ პარამეტრზე. უზმოდ ყოფნა ნიშნავს მინიმუმ 8-საათიან (ზოგი კვლევის შემთხვევაში — 12-საათიან) შიმშილობის შუალედს ბოლო კვებიდან. ამ დროს, ჩვეულებრივ დაშვებულია წყლის მიღება.

ციტოს კლინიკური მენეჯერის, ნინო ბაკურაძის თქმით, განსაზღვრულია ის კვლევები, რომელთა ჩატარებაც რეკომენდებულია უზმოდ:

სისხლის საერთო, თირკმლის ფუნქციები, კალციუმი, მაგნიუმი, რკინა, ფოსფორი, ღვიძლის ფუნქციები, შარდმჟავა, ცილა საერთო, ინსულინი, HOMA ინდექსის განსაზღვრა, C პეპტიდი სისხლში, თირეოიდული კვლევები, D ვიტამინის განსაზღვრა, ტრანსფერინის განსაზღვრა სისხლის შრატში და სხვა.

ახლა სისხლის აღებამდე მომზადებაზეც ვისაუბროთ; ბუნებრივია, რომ მზადება ანალიზის ჩასაბარებლად წინა დღეს უნდა დაიწყოთ.

• არ მიიღოთ ალკოჰოლი, რადგან მისი უმნიშვნელო დოზაც კი მთელ რიგ ცვლილებებს იწვევს ორგანიზმში. მაგალითად ირღვევა ქოლესტერინის დონე და ღვიძლის ნორმალური ფუნქცია, რაც ხშირად განაპირობებს პასუხებში ცდომილებას.
• ნუ მოწევთ თამბაქოს სისხლის ანალიზის აღებამდე, მინიმუმ, ერთი საათით ადრე. ეს დააქვეითებს ჟანგბადის სატურაციის დონეს სისხლში.
• ნუ დაიტვირთებით ფიზიკურად.
• იმ შემთხვევაში, თუ რომელიმე მედიკამენტს სისტემატურად იღებთ და შეუძლებელია მისი შეწყვეტა რამდენიმე დღით ადრე, აუცილებლად მიაწოდეთ ინფორმაციაა ექიმს.
• არ აყვეთ შფოთსა და ნერვიულობას. შეეცადეთ მინიმუმ 15 წუთის განმავლობაში მჯდომარე პოზიციაში მოდუნდეთ.

სამედიცინო ცენტრი ციტო შეგახსენებთ, რომ ნებისმიერი ლაბორატორიული თუ ინსტრუმენტული კვლევა უმჯობესია, დაინიშნოს ექიმი-თერაპევტის მიერ, პაციენტის ზოგადი მდგომარეობის საკვლევად და შემდგომი მკურნალობის დასაგეგმად.

აქციეთ ჯანმრთელობაზე ზრუნვა ჩვევად!