პარტია მოქალაქეების ლიდერის, ლევან იოსელიანის განცხადებით, როცა კომიტეტზე ნაციონალური მოძრაობის თავმჯდომარის, ნიკა მელიას იმუნიტეტის შეწყვეტის განხილვით, "პრაქტიკულად ადამიანის პატიმრობის საკითხი" წყდება, მის ადვოკატებს იქ დასწრების უფლება უნდა ჰქონოდათ. ამის შესახებ მან საპროცედურო და იურიდიულ საკითხთა კომიტეტების ერთობლივი სხდომაზე ისაუბრა.

"როდესაც ადამიანის პრაქტიკულად პატიმრობის საკითხი იხილება ხომ? თუ ჩვენ მოვუხსნით იმუნიტეტს და თქვენ ეს განზრახული გაქვთ, ეს ადამიანი აღმოჩნდება ციხეში. სულ ცოტა, მის წარმომადგენლებს უნდა ჰქონოდათ იმის საშუალება, რომ ის არგუმენტები გაეჟღერებინათ, რასაც თვლიდნენ საჭიროდ და ამით არაფერი დრამატული პროცედურული დარღვევა არ იქნებოდა, რომელიც ამ პროცეს ხელს შეუშლიდა. მე მგონი, პირიქით, უფრო გასაგებს გახდიდა ჩვენი მოქალაქეებისთვის, რომ სადღაც ჩაკეტილი არ იხილავს ერთი პარტია ადამიანის პატიმრობის ამბავს", — განაცხადა მან.

იურიდიულ საკითხთა კომიტეტის თავმჯდომარის, ანრი ოხანაშვილის განცხადებით, მათთვის წინასწარ ოფიციალურად არავის მოუმართვას, რომ ნიკა მელიას საქმის განხილვისას ადვოკატებს დასწრება სურდათ. ნიკა მელიას ადვოკატები დღეს პარლამენტში იყვნენ მოსულები, თუმცა ისინი არ შემოუშვეს.

კომიტეტების გაერთიანებულ სხდომაზე დღეს ნიკა მელიასთვის იმუნიტეტის მოხსნაზე მსჯელობენ. ამის თაობაზე საქართველოს პარლამენტს გენერალურმა პროკურატურამ 12 თებერვლას მიმართა. ისინი მელიასთვის პატიმრობის შეფარდებას ითხოვენ, თუმცა მას ამისგან სადეპუტატო მანდატი იცავს.

პროკურატურამ ნიკა მელიას ერთკვირიანი ვადა მისცა, რათა გირაოს თანხა გადაეხადა, რომელიც მას ელექტრონული სამაჯურის მოხსნის შემდეგ დაეკისრა. ეს ვადა სწორედ 12 თებერვალს ამოიწურა. მელიამ გირაოს გადახდაზე უარი თქვა, რადგან მიაჩნია, რომ საქმე პოლიტიზებულია.

ამავე საქმეზე ნიკა მელიასთვის იმუნიტეტის შეწყვეტა პროკურატურამ 2019 წლის ივნისშიც მიმართა. მაშინ პარლამენტმა მხარი დაუჭირა მელიასთვის იმუნიტეტის მოხსნას და პროკურატურას მისი დაკავების უფლება თუმცა სასამართლომ მას პატიმრობის ნაცვლად გირაო შეუფარდა.

ნიკა მელიას საქმე

ნიკა მელიას საქართველოს პროკურატურა 20 ივნისის აქციის საქმეზე ძალადობრივი ჯგუფის ხელმძღვანელობას ედავება.

2019 წლის 27 ივნისს თბილისის საქალაქო სასამართლომ მას 30 ათასი ლარის ოდენობის გირაო შეუფარდა. გარდა ამისა, მოსამართლემ სხვა შეზღუდვებიც დაუწესა:

  • საცხოვრებელი ადგილის (სახლის) დატოვება საგამოძიებო ორგანოს ინფორმირებისა და თანხმობის გარეშე;
  • საზოგადოებრივი თავშეყრის ადგილას საჯარო განცხადებების გაკეთება; მოწმეებთან ნებისმიერი სახის კომუნიკაცია;
  • დაეკისრა საგამოძიებო ორგანოსთვის პასპორტისა და პირადობის დამადასტურებელი სხვა დოკუმენტის ჩაბარების ვალდებულება.

2020 წლის 1 ნოემბერს არჩევნებთან დაკავშირებულ საპროტესტო აქციაზე მელიამ ელექტრონული მონიტორინგისთვის განკუთვნილი სამაჯური მოიხსნა და განაცხადა რომ მას აღარ გაიკეთებდა.

ამის შემდეგ, პროკურატურამ აღკვეთის ღონისძიების გამკაცრება, კერძოდ, გირაოს გაზრდა 100 ათას ლარამდე მოითხოვა. თბილისის საქალაქო სასამართლოს 2020 წლის 3 ნოემბრის განჩინებით, მელიას მიმართ მანამდე გამოყენებული აღკვეთის ღონისძიება გამკაცრდა და გირაოს ოდენობად 70 ათასი ლარი შეეფარდა.