ახალ-ახალი სერიალებისა და ფილმების წინაშე აღმოჩენილებს, როდესაც საღამოობით განსატვირთად სულ რამდენიმე საათი გვაქვს, ხშირად არჩევანის გაკეთება გვიჭირს. რომელი სერიალი ჩავრთოთ? ღირს დროის დახარჯვად? ხომ არ სჯობს ისევ ნანახი ფილმები და სერიალები გადავიმეორო?

5 წამი - ეს ის საშუალო დროა, რომელსაც "გულუხვი" მაყურებელი ახალ სერიალს, ფილმსა თუ გადაცემას მისი დაინტერესებისთვის აძლევს. ამის შესახებ ნეტფლიქსის ტალანტების მოზიდვისა და განვითარების განყოფილების ხელმძღვანელმა, კრისტოფერ მაკმა კრეატივის მიმართულებით პროფესიონალებისთვის გამართულ ღონისძიებაზე განაცხადა. მისი თქმით, კომპანიის მომხმარებელთა ქცევის შემსწავლელმა ჯგუფმა დაადგინა, რომ სწორედ პირველ 5 წამში წყვეტს მაყურებელი, გააგრძელებს თუ არა დაწყებული შოუს ყურებას.

მაკმა მაყურებლის ქცევის საილუსტრაციოდ ბრმა პაემნის მაგალითი მოიყვანა. ბარში შესულს შენს მაგიდასთან მომლოდინე ადამიანის შესახებ წარმოდგენა, გაუცნობიერებლად, მისი დანახვისთანავე გექმნება. პაემანი, გასაუბრება, უცხო ადამიანებთან შეხვედრა - ხშირად წარმოდგენის შესაქმნელად სწორედ პირველი რამდენიმე წამია გადამწყვეტი.

მაკმა მაყურებლების ანკესზე წამოსაგებად მსმენელებს ეფექტური ხერხები შესთავაზა. მისი თქმით, აუცილებელია, მაყურებელს თიზერით ან პირველი სცენით შოუს მთავარ პერსონაჟებზე, კონფლიქტსა თუ სამყაროზე წარმოდგენა შეექმნას.

"ესაა თქვენი შესაძლებლობა, თიზერის დახმარებით მაყურებლისგან პირველი თანხმობა მიიღოთ. შესაძლოა, გონებამ უკარნახოთ, რომ ეს შოუ მათთვის არაა, თუმცა თიზერში რაღაც ისეთი უნდა იყოს, რაც მათ შოუს გაგრძელებას მოანდომებს, რათა გაიგონ, რა მოხდება შემდეგ", — განაცხადა მაკმა.

თუ სერიალებს თვალს აქტიურად ადევნებ, არ დაგავიწყდეს, შემოიხედო ჩვენს ჯგუფშიც – ერთი სერიაც და…