პარტია მოქალაქეების ერთ-ერთი ლიდერის, ლევან იოსელიანის თქმით, პარლამენტის ვიცე-სპიკერად არჩევის შემდეგ დაინახა, რამდენი პრივილეგია მოჰყვება ამ თანამდებობას. თუმცა ამბობს, რომ არ აპირებს ისარგებლოს ამ შესაძლებლობებით.

"როდესაც მივედი — ოპოზიციის კვოტით გვერგო ჩვენ, იცით, ეს თანამდებობა — ამის შემდეგ დავინახე, რამდენი პრივილეგიები მოჰყვება ამ თანამდებობას: მანქანა, მძღოლი, ბენზინი ტელეფონის ხარჯი და ა.შ. და მივხვდი, რომ ეს ყველაფერი მე არ მჭირდება, იმიტომ, რომ მე ამისთვის იქ არ მოვსულვარ. არ მჭირდება იმიტომ, რომ ამის გარეშე შემიძლია გავაკეთო ის, რის გაკეთებასაც იქ ვაპირებ.

მიმაჩნია, რომ ამ ქვეყანაში, სადაც ბევრი, უამრავი პრობლემა არის, სადაც ადამიანები უბრალოდ შიმშილის ზღვარზე არიან და პანდემიის გამო ასეთ სიტუაციაშია ეკონომიკა, ჩემი ამ პრივილეგიებით სარგებლობა, უბრალოდ უხერხული იქნება", — განაცხადა იოსელიანმა პალიტრანიუსის ეთერში.

იოსელიანი ამბობს, სახლიდან პარლამენტამდე მისასვლელად მძღოლის მომსახურებით სარგებლობის გარდა, სხვა შესაძლებლობებიც აქვს.

"მე ვცხოვრობ საბურთალოზე. იმისთვის, რომ მივიდე რუსთაველის გამზირზე, არ მჭირდება მანქანა და მით უმეტეს, არ მჭირდება მძღოლი. მე თვითონაც ვმართავ მანქანას. მანქანის გარდა მყავს სკუტერიც და მყავს, თქვენ წარმოიდგინეთ ცხენიც. ასე რომ გადაადგილების პრობლემა არ მაქვს. ასე რომ, ყველგან შემიძლია მივიდე სახელმწიფოს დახმარების გარეშე და ამას მშვენივრად შევძლებ", — განაცხადა იოსელიანმა.

თუ გინდა გაიგო, როგორ მუშაობს ან ვერ მუშაობს მე-10 მოწვევის პარლამენტი, რა ინიციატივები აქვთ დეპუტატებს და ზოგადად, როგორ მიიღება გადაწყვეტილებები, რომლებიც ჩვენს ყოველდღიურობას განსაზღვრავს, შემოგვიერთდი ჯგუფში — რა ხდება პარლამენტში.

პარლამენტის ვიცე-სპიკერის პოსტზე, ოპოზიციის კვოტით ლევან იოსელიანის არჩევას 87 მომხრე და არცერთი მოწინააღმდეგე ჰყავდა.