"ბიძინა ივანიშვილი არის ჩემი ყველაზე გავლენიანი თანამოაზრე პროპორციულ არჩევნებთან დაკავშირებით ქართულ ოცნებაში", — განაცხადა გირჩის ერთ-ერთმა ლიდერმა, იაგო ხვიჩიამ ფორმულას ეთერში. კითხვაზე, ფიქრობს, თუ არა, რომ პროპორციულ საარჩევნო სისტემის დანერგვა ივანიშვილის სურვილი იყო და პროექტი დიმიტრი ხუნდაძემ ჩაუგდო, ის პასუხობს:

"არა, როგორ გეკადრებათ. ასე არ ვფიქრობ. მე ვფიქრობ, რომ ბიძინა ივანიშვილი იყო ერთადერთი კაცი საქართველოს ისტორიაში, ვისაც ეს იდეა თავში მოუვიდა და ზოგადად თქვა. მერე რომ ეს არ განახორციელა, ვერ განახორციელა, ამის გამო მან ცალკე კრიტიკა მიიღო".

კითხვაზე, ეს მხოლოდ ივანიშვილის იდეა იყო და მანამდე მსგავსი არავის ჰქონია, ხვიჩია პასუხობს:

"ვის ჰქონდა. პროპორციულ არჩევნებთან დაკავშირებით ბიძინა ივანიშვილმა თქვა ეს სიტყვა".

პროპორციული საარჩევნო სისტემა ერთ-ერთი მთავარი მოთხოვნა იყო, რომელიც მოძრაობა #სირცხვილიამ წამოუყენა ხელისუფლებას მას შემდეგ, რაც რუსი დეპუტატის, სერგეი გავრილოვის ვიზიტის გამო აქციები დაიწყო. პროტესტის მეხუთე დღეს პარტიის ლიდერმა, ბიძინა ივანიშვილმა საზოგადოებას ამცნო, რომ 2020 წელს არჩევნებს პროპორციული სისტემითა და ნულოვანი ბარიერით ჩაატარებდნენ, თუმცა პირობა არ შესრულდა. მმართველმა პარტიამ ჩააგდო საკონსტიტუციო ცვლილებების პროექტი. მაშინ ოცნების ლიდერები ამბობდნენ, რომ ეს მაჟორიტარი დეპუტატების "პრინციპულობის" გამო მოხდა.