ადვოკატი შოთა თუთბერიძე ამბობს, რომ თბილისში საპატრულო პოლიციამ 8 თებერვლის საღამოს უკანონოდ, პროფესიული საქმიანობის დროს დააკავა. მას პოლიციის კანონიერი მოთხოვნის დაუმორჩილებლობას ედავებიან. ამჟამად ის ხელწერილის საფუძველზეა გათავისუფლებული და 12 თებერვალს სასამართლოს ელოდება.

როგორც შოთა თუთბერიძე On.ge-ს უყვება, თავდაპირველად პოლიციამ მისი დაცვის ქვეშ მყოფი პირი დააკავა და მანქანაში ჩაკეტა.

"დაახლოებით საათ-ნაევარი ჰყავდათ მანქანაში, მე არ მომცეს ჩემი დაცვის ქვეშ მყოფ პირთან არც გასაუბრებისა და არც კომუნიკაციის საშუალება. კანონის დარღვევით, რა თქმა უნდა, რადგან ამის უფლება ორივეს გვაქვს. ამის შემდეგ გადასვეს უფორმო, ჩვეულებრივ მანქანაში და მიჰყავდათ სადღაც", — აღნიშნავს თუთბერიძე.

ადვოკატი ამბობს, რომ დაკავების პროცედურების დარღვევის გამო გენინსპექციაში დარეკა და მთელი ღამე ვიდეოებსაც იღებდა. თუმცა მოგვიანებით თვითონაც დააკავეს.

"უცბად ერთი დამემუქრა, რომ დაგაკავებთო, მეთქი დამაკავეთ, აბა, რას ვარღვევ და რა მუხლით უნდა დამაკავოთ-მეთქი. მაგრამ ამოიწურა ეს დავაც და დაახლოებით 20 წამში, რომელიღაცა ერთმა, იმ დროს ვიდეოს ვიღებდი, აბა, მოდი დავაკავოთო. ერთ-ერთმა ივანე ოტიაშვილმა, გადამიგრიხა ხელები ზურგს უკან, დამადო ბორკილები", — იხსენებს ადვოკატი.

შოთა თუთბერიძე ყვება, რომ პოლიციამ მანქანით "ასეირნა", შემდეგ კი რაღაც პერიოდი წერეთლის განყოფილების ეზოში, პარკინგზე მანქანაში იჯდა, სანამ სამართალდამცავები სხვებს ურეკავდნენ. თუთბერიძის თქმით, მას ადმინისტრაციული სამართალდარღვევის, პოლიციის კანონიერი მოთხოვნის დაუმორჩილებლობის საფუძველზე ოქმი გამოუწერეს და ხელწერილის საფუძველზე გაათავისუფლეს. როგორც ამბობს, ოქმისთვის ხელი არ მოუწერია, რადგან არ მისცეს საშუალება, თავისი პოზიცია ჩაეწერა.

"იქ არც ერთი პროცედურული ნორმა არ დაუცავთ. არც ჩემი და არც ამ პირების დაკავების დროს, არავითარი სტანდარტი არ იყო დაცული, დაკავების არც ერთ ეტაპზე არ განუმარტავთ არც ჩემი უფლებები, არც დაკავების მიზეზები. არც ერთი მოთხოვნა არ არის კანონიერი, რომელსაც მე არ დავემორჩილე", — განმარტავს ადვოკატი.

აღნიშნულთან დაკავშირებით On.ge შინაგან საქმეთა სამინისტროს დაუკაშირდა. უწყების პასუხს მიღებისთანავე შემოგთავაზებთ.