გერმანიამ, პოლონეთმა და შვედეთმა თავიანთი ქვეყნებიდან რუსი დიპლომატები გააძევეს. The Guardian-ის ცნობით, ევროპის ქვეყნებმა ეს გადაწყვეტილება რამდენიმე დღის წინ რუსეთის მიერ სამი ევროპელი დიპლომატის გაძევებაზე საპასუხოდ მიიღეს, რომლებიც რუსეთის საგარეო საქმეთა სამინისტროს ცნობით, ალექსეი ნავალნის მხარდასაჭერ საპროტესტო აქციაში მონაწილეობდნენ.

პოლონეთის საგარეო უწყებაში განაცხადეს, რომ პოზნანში არსებულ რუსეთის საკონსულოს დიპლომატს ქვეყნის დატოვების შესახებ აუწყეს.

ანალოგიური შეტყობინება გაუგზავნა შვედეთის საგარეო საქმეთა სამინისტრომ სტოკჰოლმში მომუშავე რუსეთის ელჩს.

გერმანიის საგარეო საქმეთა სამინისტროში რუსეთიდან მათი დიპლომატის გაძევებას უსაფუძვლო უწოდეს და განაცხადეს, რომ ის მხოლოდ საკუთარ ამოცანას ასრულებდა, რათა განვითარებულ მოვლენებს ადგილზე გაცნობოდა.

რუსეთმა შვედეთის, პოლონეთისა და გერმანიის დიპლომატები, რომლებიც ნავალნის მხარდასაჭერ არასანქცირებულ აქციაში მონაწილეობდნენ, ქვეყნიდან 5 თებერვალს გააძევა.

სამინისტროს ინფორმაციით, უწყებაში გერმანიის, შვედეთისა და პოლონეთის ელჩები გამოიძახეს და განუცხადეს, რომ მათი დიპლომატები 23 იანვრის აქციაზე იყვნენ შემჩნეულნი, რაც "მიუღებელია და არ შეესაბამება მათ სტატუსს".