რუსეთი ქვეყნიდან აძევებს შვედეთის, პოლონეთისა და გერმანიის დიპლომატებს, რომლებიც ნავალნის მხარდასაჭერ არასანქცირებულ აქციაში იღებდნენ მონაწილეობას. ინფორმაციას ამის შესახებ რუსეთის საგარეო საქმეთა სამინისტრო ავრცელებს.

სამინისტროს ინფორმაციით, უწყებაში გერმანიის, შვედეთისა და პოლონეთის ელჩები გამოიძახეს და განუცხადეს, რომ მათი დიპლომატები 23 იანვრის აქციაზე იყვნენ შემჩნეული, რაც "მიუღებელია და არ შეესაბამება მათ სტატუსს".

ნავალნის მხარდასაჭერი აქციები რუსეთის ბევრ ქალაქში 23 და 31 იანვარს გაიმართა. კიდევ ერთი აქცია იყო 2 თებერვალს მოსკოვსა და სანქტ-პეტერბუგში, როცა ოპოზიციონერის სასამართლო პროცესი მიმდინარეობდა.

ევროპელი დიპლომატების გაძევების გადაწყვეტილება მაშინ იქნა მიღებული, როცა მოსკოვში ვიზიტით ევროკავშირის საგარეო ქმედებათა სამსახურის ხელმძღვანელი, ჟოზეფ ბორელი იმყოფება.

ნავალნის საქმეში დიპლომატების აქტიურობის გამო რუსეთის საგარეო უწყება უკმაყოფილება აქამდეც გამოუხატავს. 2 თებერვალს ოპოზიციონერის სასამართლო პროცესზე 14 ქვეყნის დიპლომატიური კორპუსის წარმომადგენლები მივიდნენ.

რუსულმა სასამართლომ ქვეყნის მთავარ ოპოზიციონერ ალექსეი ნავალნის ივ როშეს საქმეზე პირობითი მსჯავრი რეალურით ჩაუნაცვლეს და სამ წელიწად-ნახევარი მიუსაჯეს. სასჯელს მოაკლდება 10 თვე, რომელიც მან შინაპატიმრობაში გაატარა და საპატიმრო დაწესებულებაში 2 წელსა და 8 თვეს გაატარებს.

ოპოზიციონერის განაჩენს უკვე მოჰყვა კრიტიკა დასავლეთის ქვეყნების მხრიდან. აშშ-ს პრეზიდენტმა, ჯო ბაიდენმა ოპოზიციონერის დაუყოვნებლივ გათავისუფლება მოითხოვა. მისი საკითხი მოსკოვში ვიზიტისისას წამოჭრა ჯოზეფ ბორელმა, ევროკავშირის საგარეო ქმედებათა სამსახურის ხელმძღვანელმა.