ევროპარლამენტარის, ვიოლა ფონ კრამონის განცხადებით, იგი საქართველოში რიგგარეშე არჩევნების ჩატარების წინააღმდეგია. ამის შესახებ მან TV პირველის ეთერში ისაუბრა.

"მართალი რომ გითხრათ, მე ამ იდეას [რიგგარეშე არჩევნების] მხარს არ ვუჭერ. ჩატარდა არჩევნები საქართველოში, დადგა შედეგი და მე რომ ვიყო ქართველი ამომრჩეველი, მაქვს მოლოდინი, რომ ჩემი ხმა არ დაიკარგება. ამიტომ პარლამენტის ყველა არჩეულ წევრზეა დამოკიდებული, შევიდნენ პარლამენტში, აიღონ მანდატები და იმუშავონ 4 წლის განმავლობაში საუკეთესო შედეგის მისაღწევად. ჩვენ არ გვჭირდება ახალი არჩევნები საქართველოში, მაშინ, როცა ვხედავთ, ქართველი ხალხი ელოდება, რომ პოლიტიკოსები პარლამენტში მუშაობას დაიწყებენ", — განაცხადა მან.

მისი თქმით, კომპრომისები, რა თქმა უნდა, საჭიროა და მმართველი პარტიაც პასუხისმგებელია, ოპოზიციისთვის გარკვეული შეთავაზებები ჰქონდეს. კრამონის განცხადებით, არსებობს საკითხები, რომელიც ოპოზიციას დააინტერესებს, თუმცა იგი ადრეული არჩევნების ჩატარების იდეას არ ეთანხმება.