2020 წელი ქართული ანიმაციების მოყვარულებისთვის საკმაოდ წარმატებული და საინტერესო აღმოჩნდა: 23 ნოემბერს იაპონიაში, ჰოკაიდოს ანიმაციური ფილმების საერთაშორისო ფესტივალზე მარიამ კაპანაძის მიტოვებული სოფლის პრემიერა შედგა. ანიმაციურმა ფილმმა მაყურებლის განსაკუთრებული სიყვარული დაიმსახურა და იაპონიის საგარეო საქმეთა სამინისტროს ჯილდოც მიიღო. თუ იაპონურ კულტურასა და ყოველდღიურობაში ანიმაციის მნიშვნელობას გავითვალისწინებთ, ეს წარმატება ერთი-ორად მნიშვნელოვანი და აღსანიშნავია.

ფოტო: Film Studio Kvali XXI

მიტოვებული სოფლის მოგზაურობა ჰოკაიდოს ფესტივალით არ დასრულებულა. ანიმაციურ ფილმს ამჯერად ტოკიოს ფოტოგრაფიის მუზეუმი მასპინძლობს. ანიმაციის მოყვარულებს ფილმის ნახვა იებისუს ხელოვნებისა და ალტერნატიული ხედვის საერთაშორისო ფესტივალის ფარგლებში შეეძლებათ. მიტოვებული სოფელი შერჩეულია კატეგორიაში - “ანიმაცია, რომელიც შეგრძნებებს ამძაფრებს". ფესტივალი 5 თებერვალს დაიწყება და 21 თებერვლის ჩათვლით გაგრძელდება.

ფოტო: Film Studio Kvali XXI

მიტოვებული სოფელი მარიამ კაპანაძის სადებიუტო ანიმაციური ფილმია, რომელიც კინოსტუდია კვალი XXI-ის, საქართველოს ეროვნული კინოცენტრისა და ქართული ფილმი - აფხაზეთის მხარდაჭერით შეიქმნა. ანიმაციური ფილმის პროდიუსერი მარიამ კანდელაკია. აღსანიშნავია, რომ ჰოკაიდოში წარმატებული დებიუტის შემდეგ, ანიმაციური ფილმი სლოვენიაში, საერთაშორისო ანიმაციურ ფესტივალ Animateka-ზეც მიიწვიეს.

მსოფლიო წარმატების შემდეგ მიტოვებული სოფლის ისტორიას ანიმაციების მოყვარულები საქართველოშიც სულმოუთქმელად ელიან.