საგარეო საქმეთა სამინისტროსთან ოკუპანტების მიერ გატაცებული ზაზა გახელაძის სასჯელი გააპროტესტეს. ადგილზე შეკრებილი აქტივისტები მთავრობას უმოქმედობაში ადანაშაულებენ.

აქტივისტები საგარეო უწყებასთან ბანერებითა და სასტვენებით მივიდნენ. იყო დაპირისპირება პოლიციასთან, რა დროსაც სამართალდამცავებმა ერთ-ერთი აქტივისტის გაყვანა სცადეს, თუმცა აქციაზე მყოფებმა ამის საშუალება არ მისცეს.

აქტივისტებთან ერთად ზაზა გახელაძისა და მისი ოჯახის მხარდასაჭერად სამინისტროსთან ექიმი ვაჟა გაფრინდაშვილიც მივიდა, რომელიც საოკუპაციო რეჟიმს ორ თვეზე მეტი ჰყავდა დაკავებული.

ფოტო: გვანცა სეთურიძე / On.ge

ოკუპირებული ცხინვალის ე.წ. სასამართლომ, ზაზა გახელაძეს 12 წლითა და 6 თვით უკანონო პატიმრობა დღეს, 5 თებერვალს მიუსაჯა.

საოკუპაციო ძალების მიერ გასული წლის ზაფხულში დაკავებულ ზაზა გახელაძეს დე ფაქტო ხელისუფლებამ ბრალი წაუყენა რუსეთის სისხლის სამართლის კოდექსის ორი მუხლით — "სიცოცხლის ხელყოფის მცდელობა" და "სახელმწიფო საზღვრის უკანონოდ გადაკვეთა".

გახელაძე კასპში 11 ივლისს გაიტაცეს, მანამდე კი ცეცხლსასროლი იარაღით დაჭრეს. რუსული მხარის მტკიცებით, ზაზა გახელაძემ ცეცხლი პირველმა გახსნა. მათივე თქმით, გახელაძემ ჩვენებაში აღიარა, რომ საოკუპაციო საზღვარი მიზანმიმართულად გადაკვეთა. თუმცა, რადიო თავისუფლების ინფორმაციით, სასამართლო პროცესზე ერთ-ერთმა მოწმემ თქვა, რომ ზაზა გახელაძეს დამიზნებით არ უსვრია.

გაიგეთ მეტი: