სახელმწიფო უსაფრთხოების სამსახურის განცხადებით, გორის მუნიციპალიტეტის სოფელ გუგუტიანთკარის მიმდებარე ოკუპირებულ ტერიტორიაზე საოკუპაციო რეჟიმის წარმომადგენლებმა ამავე სოფლის მკვიდრი უკანონოდ დააკავეს. მათივე ცნობით, დაკავება გუშინ, 2 თებერვალს მოხდა.

"საოკუპაციო ძალების მიერ უკანონო დაკავების ფაქტთან დაკავშირებით, გააქტიურდა ცხელი ხაზი. მომხდარის შესახებ ეცნობა ევროკავშირის სადამკვირვებლო მისიას. ასევე, მოხდა საერთაშორისო პარტნიორების ინფორმირება. უკანონო დაკავებები მნიშვნელოვნად აუარესებს საოკუპაციო ხაზს გასწვრივ, ასევე, ოკუპირებულ ტერიტორიებზე არსებულ უსაფრთხოების გარემოს და ადგილობრივი მოსახლეობის ყოველდღიურობას ართულებს", — აცხადებენ სუს-ში.

უწყების ინფორმაციით, არსებული მექანიზმების გამოყენებით უკანონოდ დაკავებული პირის დაუყოვნებლივ გათავისუფლების მიმართულებით აქტიური მუშაობა მიმდინარეობს.