პარტია მოქალაქეების ლიდერი, ალეკო ელისაშვილი ამბობს, რომ პარლამენტში შესვლის არ რცხვენია, რადგან ხელმოწერილი მემორანდუმით მნიშვნელოვანი საარჩევნო ცვლილებების განხორციელებაა შესაძლებელი. კითხვაზე, რა აზრი აქვს ამ მემორანდუმს, როცა საკონსტიტუციო ცვლილებებისთვის 113 ხმა არის საჭირო, პარლამენტში კი ამდენი დეპუტატი არ არის, ის ამბობს, რომ ოპოზიცია პარლამენტში 1 დღით უნდა შევიდეს.

"შემოვიდეს ოპოზიცია, ერთი დღით მაინც შემოვიდეს, როცა ეს საკითხი კენჭისყრაზე დადგება. 113 ხმა არის საჭირო, 17 მანდატი არის უკვე დამატებით საჭირო. ერთი დღით შემოვიდეს და ეს შეიცვლება", — განაცხადა მან მთავარი არხის ეთერში.

მსგავსი პასუხი ჰქონდა ამ კითხვაზე პარლამენტის თავმჯდომარე არჩილ თალაკვაძესაც. მან განაცხადა, რომ ოპოზიციასთან მოლაპარაკებებს გააგრძელებენ.

"ჩვენ განვაგრძობთ მოლაპარაკების პოლიტიკურ დიალოგს ოპოზიციასთან და ველით, რომ სხვა ოპოზიციური პოლიტიკოსებიც შემოუერთდებიან საპარლამენტო პროცესს, ეს ერთი და მეორეც, რაც შეეხება შეთანხმების იმ ნაწილს, რომელსაც სჭირდება საკონსტიტუციო უმრავლესობა, ჩვენ ერთად განვაგრძობთ, საპარლამენტო ოპოზიციასთან ერთად, ეს არის უკვე მეორე ოპოზიციური პარტია, რომელიც პარლამენტში იქნება წარმოდგენილი, განვაგრძობთ ჩვენს ძალისხმევას იმისათვის, რათა შემოუერთდეს პროცესს კიდევ მინიმუმ იმდენი წარმომადგენელი ოპოზიციისგან, რაც იქნება საკმარისი ამ ცვლილების განხორციელებისთვის. [როგორ?] მოლაპარაკების საფუძველზე", — განაცხადა თალაკვაძემ.

28 იანვარს, ე.წ. კარტოგრაფების საქმეზე დაკავებულების, ივერი მელაშვილისა და ნატალია ილიჩოვას გირაოს სანაცვლოდ გათავისუფლების შემდეგ, ალეკო ელისაშვილმა განაცხად, რომ ეს იყო ქართულ ოცნებასა და ოპოზიციას შორის მოლაპარაკების შედეგი. ელისაშვილმა ასევე თქვა, რომ მათი გათავისუფლება ყველაფერს ცვლის.

ივერი მელაშვილმა განაცხადა, რომ არ უნდა მისი საქმე ვინმემ პარლამენტში შესასვლელად გამოიყენოს და თუ ვინმე ამას აპირებს, წავა და ისევ ციხეში ჩაჯდება.

29 იანვარს, პარტია მოქალაქეების ლიდერებმა განაცხადეს, რომ პარლამენტში შედიან.

გაიგეთ მეტი:

თუ გინდა გაიგო, როგორ მუშაობს ან ვერ მუშაობს მე-10 მოწვევის პარლამენტი, რა ინიციატივები აქვთ დეპუტატებს და ზოგადად, როგორ მიიღება გადაწყვეტილებები, რომლებიც ჩვენს ყოველდღიურობას განსაზღვრავს, შემოგვიერთდი ჯგუფში — რა ხდება პარლამენტში.