მოქალაქეების ლიდერის, ალეკო ელისაშვილის განცხადებით, ყველა ის საკითხი, რაზეც ქართულ ოცნებასთან შეთანხმდნენ, თუ პარლამენტში 1-ელ მარტამდე არ დაინიცირდება, როგორც შევიდნენ პარლამენტში, ისე გავლენ.

"დოკუმენტში წერია, რომ რაზეც შევთანხმდით ამ საკითხების ინიცირება უნდა მოხდეს პირველ მარტამდე და განხილვა უნდა დასრულდეს პირველ მაისამდე. თუ არ მოხდება პირველ მარტამდე ინიცირება, როგორც შევალთ პარლამენტში და როგორც შემოვედით და დავესწრებით სხდომას, ისევ გავალთ 1 თვის განმავლობაში", — განაცხადა მან.

დღეს პარტია მოქალაქეების ლიდერები ქართულ ოცნებას შეხვდნენ. შეხვედრის დასრულების შემდეგ, ელისაშვილმა განაცხადა, რომ ისინი მმართველ პარტიასთან შეთანხმდნენ და როგორც კი შეთანხმება გაფორმდება, საპარლამენტო საქმიანობაში ჩაერთვებიან.

პარტია მოქალაქეების ლიდერები არჩილ თალაკვაძესა და მამუკა მდინარაძეს აქამდეც შეხვდნენ. ელისაშვილის განმარტებით, მათ სურდათ გაერკვიათ, აპირებდა თუ არა მმართველი პარტია კომპრომისზე წასვლას ოპოზიციასთან მოლაპარაკებებისას. მისი თქმით, დეტალურად განიხილეს ოთხივე პუნქტი, რასაც ჯერ კიდევ ფასილიტატორ ელჩებთან მოლაპარაკებებისას ითხოვდნენ. მაშინ მამუკა მდინარაძემ განაცხადა, რომ საბოლოოდ, ქართულ ოცნებასა და მოქალაქებს შორის შეთანხმება შედგება. თუმცა, მანვე აღნიშნა, რომ შეხვედრის დროს მოქალაქეების ლიდერებს პოლიტპატიმრებზე არ ესაუბრნენ.

გუშინ, 28 იანვარს, კარტოგრაფების გირაოს სანაცვლოდ გათავისუფლების შემდეგ, ელისაშვილმა განაცხადა, რომ ეს ყველაფერს ცვლის, რადგან მათთვის ერთ-ერთი მთავარი მოთხოვნა იყო პარლამენტში შესასვლელად. მისივე თქმით, ხვალ პარლამენტში არ შევა, რადგან საარჩევნო საკითხები ჯერ კიდევ არ არის შეცვლილი.