Heritage Foundation-ის კვლევის მიხედვით, საქართველო ეკონომიკური თავისუფლების კუთხით, 72,6 ქულით, უმეტესად თავისუფალი ქვეყნების კატეგორიაში შევიდა და რეიტინგით 23-ე ადგილი დაიკავა მსოფლიოში, მე-12 ადგილი კი - ევროპაში.

ქვეყნის ძირითად მიღწევად კვლევაში მითითებულია საჯარო ფინანსების მენეჯმენტი, ღია ბაზარი და მარეგულირებლის ეფექტურობა:

"გლობალური და ეკონომიკური გამოწვევების მიუხედავად, საქართველოს ეკონომიკამ საგრძნობი მდგრადობა გამოიჩინა ეკონომიკური თავისუფლების ინდექსის მიხედვით. ორწლიანმა ფისკალურმა კონსოლიდაციამ, მთავრობას საშუალება მისცა გაეკონტროლებინა მაკროეკენომიკური სტაბილურობა".

კვლევის მიხედვით, საქართველოს მდგომარეობა 2012 წლის შემდეგ თავისუფალი ეკონომიკის ინდექსის მიხედვით 3,2 ქულით გაიზარდა:

"საქართველოს სწრაფვა დიდი ეკონომიკური თავისუფლებისაკენ, გამყარებულია შედარებითი პოლიტიკური სტაბილურობით."

სხვა ქვეყნებთან შედარებით, საქართველო უსწრებს ისეთ განვითარებულ ქვეყნებს, როგორიცაა ფინეთი, შვედეთი, ავსტრია, ნორვეგია და ლატვია.

აშშ "უმეტესად თავისუფალი" ეკონომიკის მქონე ქვეყნებს შორის, მე-11 ადგილზეა ირლანდიის, ესტონეთისა და დიდი ბრიტანეთის შემდეგ.

თავისუფალი ქვეყნების ხუთეულში მოხვდა ჰონგ კონგი, სინგაპური, ახალი ზელანდია, შვეიცარია და ავსტრია.

შედარებით თავისუფალი ქვეყნების რიცხვში შევიდნენ: პოლონეთი, ურუგვაი, კვიპროსი, ესპანეთი, ბელგია, ბარბადოსი, იორდანია, პერუ, ასევე, საფრანგეთი იტალია და თურქეთი.

უმეტესად არათავისუფალ ქვეყნებს შორის არიან შრი ლანკა, სვაზილენდი, ტონგა, ყირგიზეთი, ბუტანი, ლიბანი, ინდონეზია, მონღოლეთი.

რეპრესირებულ ქვეყნების რიცხვში კი მოხვდნენ ლაოსი, ანგოლა ბელორუსია, ბურმა, ეკვადორი, ბოლივია, უკრაინა, უზბეკეთი, არგენტინა, ირანი, ვენესუელა კუბა და ჩრდილოეთ კორეა.

Heritage Foundation არის ვაშინგტონში დაფუძნებული ამერიკული კონსერვატიული კვლევითი ორგანიზაცია. ფონდმა დიდი როლი შეასრულა კონსერვატიული მოძრაობაში, რონალდ რეიგანის პრეზიდენტობისას. იგი დღემდე აგრძელებს მნიშვნელოვანი ზეგავლენის მოხდენას შტატების საჯარო პოლიტიკაზე.

2016 წლის თავისუფალი ეკონომიკის ინდექსის კვლევა მოიცავს 186 ქვეყნის განახლებულ ქულასა და მაკროეკენომიკურ მონაცემებს. Heritage Foundation-ის მიხედვით. ეკონომიკური თავისუფლება გულისხმობს ყველა ადამიანის ფუნდამენტურ უფლებას, გააკონტროლოს თავისი შრომა და საკუთრება. ეკონომიკურად თავისუფალ საზოგადოებაში, ინდივიდებს შეუძლიათ იმუშავონ, აწარმონ, მოიხმარონ და დააბანდონ ისე, როგორც სურთ.

Heritage Foundation-მა ქვეყნების ეკონომიკური თავისუფლება გაზომა კანონის უზენაესობის (საკუთრების უფლება და კორუფციისგან თავისუფლება), შეზღუდული მთავრობის (ფისკალური თავისუფლების), მარეგულირებლის ეფექტურობის (ბიზნესის თავისუფლება) და ღია ბაზრის (ვაჭრობის თავისუფლება, ინვესტიციების თავისუფლება) მიხედვით.