შინაგან საქმეთა სამინისტროს განცხადებით, კიბერდანაშაულის ბრალდებით 1996 წელს დაბადებული ინდოეთის მოქალაქე დააკავეს. მას ბრალად ედება კომპიუტერულ სისტემაში უნებართვო შეღწევა, კომპიუტერული მონაცემების უნებართვო მოპოვება და უკანონოდ გამოყენება, ასევე, ქურდობა, რამაც მნიშვნელოვანი ზიანი გამოიწვია. დანაშაული 3-დან 5 წლამდე ვადით თავისუფლების აღკვეთას ითვალისწინებს.

გამოძიების ინფორმაციით, ბრალდებულმა ერთ-ერთი კომერციული ბანკის ინტერნეტბანკის ვებგვერდის მსგავსი, ყალბი — ე.წ. ფიშერული გვერდი შექმნა, რომლის ბმული ამავე ბანკის მომხმარებელს ელექტრონული ფოსტით გაუგზავნა და მისი ავტორიზაციის მონაცემებს დაეუფლა. როგორც უწყებაში აცხადებენ, ბრალდებულმა მოპოვებული პირადი მონაცემების გამოყენებით, მომხმარებლის ინტენეტბანკის პროფილში შეაღწია და მისი ანგარიშიდან საკუთარზე 9 500 ლარი გადარიცხა. ფულის ნაწილი — 6 084 ლარი ბანკომატიდან გაანაღდა.

ბრალდებული თბილისში დააკავეს. სამინისტროში აცხადებენ, რომ დაკავებულის დროებითი საცხოვრებელი ბინის ჩხრეკისას მობილური ტელეფონები, პორტატიული კომპიუტერები და საბანკო პლასტიკური ბარათები ნივთმტკიცების სახით ამოიღო.

გამოძიება მიმდინარეობს საქართველოს სსკ-ის 285-ე მუხლის 1-ლი ნაწილით, 158-ე მუხლის 1-ლი ნაწილით, 284-ე მუხლის 1-ლი ნაწილით და 177-ე მუხლის მე-2 ნაწილის "ა" ქვეპუნქტით, რაც გულისხმობს კომპიუტერული მონაცემების უნებართვო მოპოვებასა და უკანონოდ გამოყენებას, კომპიუტერულ სისტემაში უნებართვო შეღწევას და ქურდობას, რამაც მნიშვნელოვანი ზიანი გამოიწვია.