საქართველოს ბანკი ადგილობრივი წარმოების ხელშეწყობას განაგრძობს. ამჯერად, ბანკის მხარდაჭერით, კომპანია სილლარი თანამედროვე სტანდარტების საცხობის და ნახევარფაბრიკატების პროექტს უძღვება. მისი ჯამური ღირებულება 1 100 000 ევროს შეადგენს, სადაც კერძო ინვესტიცია 850 000 ევროს, ხოლო ბანკის ფინანსური ჩართულობა კი 250 000 ევროს უტოლდება.

აღნიშნული საწარმო დააკმაყოფილებს როგორც სურსათის ეროვნული სააგენტოს ნორმებსა და რეგულაციებს, ასევე ევრო სტანდარტების ყველა მოთხოვნას. მასში ინტეგრირებული იქნება ISO 22000 და HACCP სისტემები. საცხობი აღიჭურვება როგორც საერთაშორისო დონის დანადგარებით (რომელიც შეძენილია თანამედროვე იტალიურ კომპანიებში და აქვთ სერთიფიკატი EURO-1), ასევე საოფისე და სამაცივრე-სასაწყობო განყოფილებებით. საწარმო მომხმარებელს სხვადასხვა სახეობის იტალიურ პურებს — "Piadina"-ს შესთავაზებს. გარდა ამისა, ასორტიმენტში იქნება მზა სენდვიჩები, დაჭრილი ლორი და ყველი. ასევე, ღვინის ასორტები, სადაც წარმოდგენილი იქნება ქართული ყველი, ჩირეული, თხილი, ნიგოზი, ჩურჩხელები და დელიკატესები, რომლის რეალიზაციაც იგეგმება როგორც საქართველოში, ასევე უკრაინაში, რუსეთში, ჩინეთში, ევროპისა და არაბეთის სხვადასხვა ქვეყნებში. ობიექტი 30 ადამიანს დაასაქმებს, მისი გახსნა კი მარტში იგეგმება.

"საქართველოს ბანკი, ადგილობრივი წარმოების ხელშეწყობის მიზნით, მცირე ზომის ბიზნესების მხარდაჭერას განაგრძობს. სულ მალე, ბანკის ჩართულობით ევროპული სტანდარტის ახალი საცხობი გაიხსნება. საწარმო მომხმარებელს მაღალი ხარისხის პურის მრავალ სახეობას შესთავაზებს, სამომავლოდ კი ასორტიმენტს კიდევ უფრო გაამრავალფეროვნებს. მსგავსი პროექტების მხარდაჭერა ბანკის ერთერთ უცლელ პრიორიტეტად რჩება, რადგან ის ხელს უწყობს საქართველოში ბიზნესის განვითარებას და ახალი სამუშაო ადგილებს შექმნას. საბოლოო ჯამში კი ეს ყველაფერი დადებითად აისახება ქვეყნის ეკონომიკაზე", — განაცხადა საქართველოს ბანკის მცირე და საშუალო მიმართულების ხელმძღვანელმა, ზურაბ მასურაშვილმა.

შპს სილლარი 2019 წლის მარტიდან არის თბილისის თავისუფალი ინდუსტრიული ზონის საწარმო, რომლის საქმიანობა რეგულირდება საქართველოს საგადასახადო კოდექსით, კანონით "თავისუფალი ინდუსტრიული ზონის შესახებ" და სპეციალური კანონქვემდებარე ნორმატიული აქტებით.