ავსტრალიის აგროკულტურის სამინისტროს ცნობით, მტრედი ჯო, რომელზეც ფიქრობდნენ, რომ კონტინენტზე ამერიკიდან ჩაფრინდა, რეალურად ამერიკელი არ არის, რამაც მისი სიცოცხლე იხსნა.

ავსტრალიის ოფიციალურმა ორგანოებმა მტრედის დაძინება გადაწყვიტეს, რადგან ვირუსების ენდემურ ფრინველთა სახეობებზე გადაცემის რისკი არსებობდა.

მტრედის ამერიკულ წარმომავლობას იარლიყი ამტკიცებდა, რომელიც ფეხზე ჰქონდა შებმული, მაგრამ იარლიყის ნამდვილობა ეჭვქვეშ დადგა.

აშშ-ში მიმდინარე მტრედების რბოლიდან ერთ-ერთი მრბოლელი გაუჩინარდა, თუმცა ის მოლურჯო შეფერილობის იყო, ხოლო ავსტრალიაში აღმოჩენილი მტრედი თეთრი და ყავისფერი ელფერით.

"ავსტრალიაში ნაპოვნი მტრედი ყალბ იარლიყს ატარებს და მისი დაძინებაც არასაჭიროა, რადგან მისი სახლი ავსტრალიაა. სამწუხაროა, რომ ყალბი ინფორმაცია ასე სწრაფად გავრცელდა, თუმცა მოხარულები ვართ, რომ კონტინენტზე ამერიკელი მტრედი არ აღმოჩნდა", — განაცხადა ამერიკული მრბოლელი მტრედების გაერთიანებამ.

აგროკულტურის სამინისტროს განცხადებით ბოლო ინფორმაცია ნამდვილია და ჯო დიდი ალბათობით ავსტრალიელია. ამიტომ მტრედის დაძინება გადაიფიქრეს.

ცენტრალური ქამბერლენდის მრბოლელი მტრედების ფედერაციის პრეზიდენტის, ფილ მიურეის აზრით მტრედი მრბოლელიც კი არ არის.

"მრბოლელი მტრედი არ არის. ის უფრო დახვეწილია, როგორც ჩანს ვიღაცას იარლიყი ჰქონდა და უბრალოდ გაუკეთა. მას ასაკიც არ უწყობს ხელს, სულ 3-4 თვის იქნება. მას ძალა არ ეყოფოდა 10-საათიანი ფრენისა და 12 000კმ-ის დაფარვისთვის. გასული 40 წლის განმავლობაში, მსგავსი შემთხვევა რამდენიმეჯერ მოხდა", — განაცხადა მიურეიმ.

მაიკლ მაკკორმაკის, ავსტრალიის მოქმედი პრემიერმინისტრის თქმით, მტრედის მიერ გავლილი გზა და წარმომავლობა, ჯერ დადგენილი არ არის. მან მტრედს წარმატება უსურვა.

მტრედს, რომელმაც ამერიკიდან ავსტრალიამდე 13000კმ იფრინა, ევთანაზია ემუქრება