დაავადებათა კონტროლის ცენტრის დირექტორის მოადგილის, პაატა იმნაძის განცხადებით, ქვეყანაში Pfizer-ის ვაქცინის შენახვის პრობლემა არ არის და იმაზე მეტის შენახვაც შეუძლიათ, ვიდრე საჭიროა. მისივე თქმით, შეუძლიათ დიდი ოდენობით სხვა ვაქცინების შენახვაც.

"ჩვენ ვაქცინის შენახვა შეგვიძლია ძალიან ბევრის, გააჩნია რომელ რეჟიმზე. შეგვიძლია შევინახოთ ძალიან ბევრი, იმდენი, რომ საქართველოს კი არა უფრო დიდ ქვეყანასაც ეყოფა, იმდენი შეგვიძლია ჩვეულებრივი ვაქცინა შევინახოთ.

შეგვიძლია შევინახოთ ვაქცინა, რომელიც არის -20 გრადუსიანი ყოველგვარი პრობლემის გარეშე. თქვენ წარმოიდგინეთ, რაზეც არის ლაპარაკი Pfizer-ის ვაქცინაზე, იმის შენახვის შესაძლებლობები გვაქვს გაცილებით მეტი, ვიდრე გვჭირდება", — განაცხადა მან პოლიტიკის ფორმულას ეთერში.

მანვე აღნიშნა, რომ კოვაქს პლატფორმას უკვე მეორედ გაუგზავნეს დადასტრურებული კითხვარი, სადაც აღნიშნულია, რომ ამ ვაქცინის მიღება შეუძლიათ.

"კოვაქსის პლატფორმაზე ჯერ კიდევ ზაფხულში ბევრმა ქვეყანამ, როცა პირველი განაცხადები წარადგეინეს, თქვა რომ ვერ მიიღებდნენ ამ ვაქცინას. ჩვენ მაშინვე თქვით, რომ შეგვიძლია ამ ვაქცინის მიღება. მოგეხსენებათ ამას სპეციალური ლოჯისტიკური, ცივი ჯაჭვი სჭირდება ძალიან სპეციფიური.

ჩვენ კიდევ ერთხელ გავაგზავნეთ სპეციალური კითხვარი, რომელიც ქვეყანას უნდა შეევსო, რომ ჩვენ მზად ვართ, მივიღოთ კოვაქსიდან ფაიზერის ტიპის ვაქცინა", — განაცხადა მან.

Pfizer-ის ვაქცინის შენახვის საკითხი აქტუალური მას შემდეგ გახდა, რაც ინფექციური საავადმყოფოს დირექტორმა, თენგიზ ცერცვაძემ განაცხადა, რომ ქვეყანას მისი მიღება არ შეუძლია. აღნიშნული NCDC-ის დირექტორმა, ამირან გამყრელიძემ უარყო და განაცხადა, რომ ქვეყანაში არის მაცივრები იმისთვის, რომ ამ ვაქცინის -80 გრადუსის ცივი ჯაჭვზე შენახვა შეძლონ.

13 იანვარს ჯანდაცვის მინისტრმა, ეკატერინე ტიკარაძემ განაცხადა, რომ უახლოეს მომავალში საქართველოში მოსახლეობის აცრა Pfizer-ის ვაქცინით გახდება შესაძლებელი.

Pfizer-BioNTech-ის ვაქცინას იყენებენ აშშ-ში, დიდ ბრიტანეთში, კანადასა და ევროკავშირის ქვეყნებში. ის დამტკიცებულია ჯანდაცვის მსოფლიო ორგანიზაციის მიერაც.