Marriage Story-ის რეჟისორი ნოა ბაუმბახი ამერიკელი ნოველისტის, დონ დელილოს კლასიკას, თეთრ ხმაურს ფილმად გადაიღებს. ამის შესახებ ინფორმაცია თავდაპირველად ტვიტერზე გავრცელდა. წყარო კი კინოინდუსტრიაში ფილმებისა და სერიალების ანონსის წამყვანი გამოცემა Production Weekly-ია.

ადაპტაციაში მონაწილეობას მიიღებენ ადამ დრაივერი და Little Women-ისა და Lady Bird-ის რეჟისორი და ბაუმბახის პარტნიორი, გრეტა გერვიგი. ფილმი ნეტფლიქსზე გამოვა.

გრეტა გერვიგი და ნოა ბაუმბახი

ფოტო: Frazer Harrison / Getty Images

თეთრი ხმაური სატირული, კომედიური და საშინელებათა ისტორიებით გაჯერებული ისტორიაა ინდუსტრიალიზმზე. ნოველის მიხედვით, მოქმედება გამოგონებულ ქალაქში ხდება. კატაკლიზმებისა და მატარებლის ავარიის შემდეგ, ჰაერში ქიმიური ნაერთები იფანტება და ქალაქის თავზე ვეება შავი ღრუბელი ჩნდება — რაც თეთრი ხმაურის ხილული ალეგორიაა. მთავარი პერსონაჟი ჰიტლერის ბიოგრაფიით გატაცებული უნივერსიტეტის პროფესორი ჯეკ გლედნია, რომლის როლსაც დრაივერი შეასრულებს. ის ცოლთან, ბაბეტთან (გრეტა გერვიგი) და ოთხ შვილთან ერთად ცხოვრობს და მომხდარი შემთხვევა მის ცხოვრებას თავდაყირა აყენებს. 1984 წლის ნოველაში ნარატორად სწორედ ჯეკ გლედნი გვევლინება.

ფილმის გადაღებები, სავარაუდოდ, ივნისში დაიწყება. White Noise ბაუმბახის პირველი არასაავტორო ნამუშევარი იქნება.