ნიუ-იორკს დონალდ ტრამპის ორგანიზაციასთან ხელშეკრულების შეწყვეტა სურს. ამის შესახებ ინფორმაცია გამოცემა NbcNewYork-მა გაავრცელა.

საკითხი ეხება ცენტრალ პარკის ყინულის ორ მოედანსა და ბრონქსის გოლფის მოედანს. ქალაქის მერის განცხადებით, ეს გადაწყვეტილება მას შემდეგ მიიღეს, რაც ტრამპის მხარდამჭერები კანონდარღვევით კაპიტოლიუმში შეიჭრნენ.

"პრეზიდენტმა მთავრობის წინააღმდეგ აჯანყება გამოიწვია, რაც არაკონსტიტუციური აქტია და რასაც ხალხის სიცოცხლე ემსხვერპლა. ეს მიუტევებელია. ჩვენი იურისტების გუნდი ახლა მუშაობს საკითხზე და როცა დადგენილებას მივიღებთ, ჩვენ სათქმელი გვექნება ", — განაცხადა ქალაქის დემოკრატმა მერმა.

6 იანვარს ვაშინგტონში, კაპიტოლიუმთან მიმდინარე ტრამპის მხარდამჭერების აქცია დაპირისპირებაში გადაიზარდა. დემონსტრანტებმა ბარიერი გაარღვიეს და შენობაში შეიჭრნენ. კონგრესში ევაკუაცია გამოცხადდა, ქალაქში კი კომენდანტის საათი.

ტრამპის მხარდამჭერების მიერ ორგანიზებული არეულობის მიუხედავად, 7 იანვარს, აშშ-ს კონგრესმა საპრეზიდენტო არჩევნებში დემოკრატი ჯო ბაიდენის გამარჯვება ოფიციალურად დაამტკიცა.

სენატმა და წარმომადგენელთა პალატამ უარყვეს მოთხოვნები ჯორჯიასა და პენსილვანიაში ბაიდენისთვის ხმების გაუქმებასთან დაკავშირებით. რესპუბლიკური პარტიის წარმომადგენლები ასევე აპროტესტებდნენ არიზონას, ნევადისა და მიჩიგანის შედეგებსაც.

არჩეული პრეზიდენტი, ჯო ბაიდენი და არჩეული ვიცე-პრეზიდენტი, კამალა ჰარისი უფლებამოსილებას 20 იანვარს, ინაუგურაციის შემდეგ შეუდგებიან. მანამდე კი ხელისუფლების გადაბარების პროცესი იქნება.

ამერიკის შეერთებული შტატების პრეზიდენტის, დონალდ ტრამპის იმპიჩმენტის მოთხოვნის საკითხს რამდენიმე რესპუბლიკელიც შეუერთდა.

არეულობის შემდეგ პირველ საჯარო გამოსვლაში, პრეზიდენტ ტრამპს მომხდართან დაკავშირებით პასუხისმგებლობა არ აუღია.

გამომდინარე იქიდან, რომ დემოკრატებს წარმომადგენელთა პალატაში უმრავლესობა აქვთ, დიდი შანსია, რომ ტრამპი გახდება პირველი პრეზიდენტი აშშ-ის ისტორიაში, რომელსაც ორჯერ მოუწყობენ იმპიჩმენტს.