ქუთაის-გაენათელი მიტროპოლიტი იოანე, თეოლოგების შეთავაზებას, მათ მიერ გამოქვეყნებული "საშობაო ეპისტოლეს" შესახებ დებატებზე, უარით პასუხობს. მისი თქმით, თეოლოგებს არც არგუმენტები აქვთ და ვერც მის მიერ შეთავაზებული გამოცდა ჩააბარეს.

"თეოლოგებისგან" ერთ არგუმენტს მაინც ველოდი, ლანძღვის ოსტატები აღმოჩნდნენ. ლანძღვის კონტექსტში დიალოგი არ შედგება. ჰქონდათ შანსი, საკუთარი თეოლოგიური ღირსება გამოეჩინათ. ჩემ მიერ შეთავაზებული გამოცდის ერთ ბილეთზეც ვერ გასცეს პასუხი. მათ ფრაზეოლოგიას თეოლოგიასთან საერთო არაფერი აქვს", — წერს მიტროპოლიტი ფეისბუქზე.

მიტროპოლიტი თეოლოგებს, რომლებმაც საჯარო დებატებში გაიწვიეს "ნიღაბახდილ თეოლოგებს" უწოდებს და ამბობს, რომ მათ კიდევ ერთხელ დაადასტურეს თავიანთი სულიერი დაცემა.

"კოკასა შიგან რაცა დგას, იგივე წარმოდინდების", შოთა რუსთაველი", — წერს მიტროპოლიტი.

თეოლოგთა ნაწილმა მათ მიერ გამოქვეყნებულ "საშობაო ეპისტოლეში" წარმოდგენილ საკითხებთან დაკავშირებით ქუთასი-გაენათის მიტროპოლიტი იოანე საჯარო დებატებში გამოიწვია. იქამდე მიტროპოლიტმა მათ განათლებაში ეჭვი შეიტანა და განაცხადა, რომ თეოლოგის წოდება გაუფასურებული და შეურაცხყოფილია. მან "საშობაო ეპისტოლეს" ავტორი თეოლოგების გამოცდა გადაწყვიტა და განაცხადა, რომ მათთან საუბარს იმ შემთხვევაში გააგრძელებდა, თუ ისინი მის მიერ დასმული ორი კითხვიდან, ერთ-ერთს მაინც უპასუხებდნენ.

პოლემიკა სასულიერო პირსა და თეოლოგებს შორის მას შემდეგ დაიწყო, რაც ამ უკანასკნელებმა კრიტიკული "საშობაო ეპისტოლე" გამოაქვეყნეს. აღნიშნულ ეპისტოლეში მათ საპატრიარქოსა და პატრიარქის ქმედებები გააკრიტიკეს. ეპისტოლეს შეფასებისას მიტროპოლიტმა იოანემ მათ წარმართები უწოდა და განაცხადა, რომ სასულიერო განათლებას, რომლის მიღების უფლება პატრიარქისგან მიეცათ, საპატრიარქოსთვის ქვებისა და ტალახის სასროლად იყენებენ.

მიტროპოლიტის მიერ მათი "საშობაო ეპისტოლეს" შეფასებისას გაკეთებული ბრალდებების საპასუხოდ, თეოლოგებმა მისთვის საეკლესიო სასამართლოს დანიშვნა მოითხოვეს. თეოლოგების პასუხის პასუხს ფეისბუქ პოსტით უპასუხა ქუთაის-გაენათელმა მიტოროპიტმა და დაწერა რომ "ვიღაც თეოლოგების" მოთხოვნამ ბოლშევიკური რეჟიმი გაახსენა.

გაიგეთ მეტი: