ამერიკული გამომცემლობა, Simon & Schuster, სენატორ ჯოშ ჰოულის წიგნს აღარ გამოსცემს. ჰოული რესპუბლიკელი კონგრესმენია, რომელმაც საპრეზიდენტო არჩევნების შედეგების შეცვლა სცადა. თავდაპირველად, სენატორი არჩევნების შედეგების კითხვის ნიშნის ქვეშ დაყენების გამო გააკრიტიკეს, შემდგომ კი იგი კაპიტოლიუმზე განხორციელებული თავდასხმისა და ტრამპის მხარდამჭერების წახალისებაში დაადანაშაულეს.

ჰოულის წიგნი, სახელწოდებით ტექნოლოგიური გიგანტების ტირანია ცნობილ ამერიკულ გამომცემლობას ივნისის თვეში უნდა გამოეცა. არამხატვრული ჟანრის ნაწარმოები პოპულარული სოციალური მედიის პლატფორმების — ფეისბუქის და ტვიტერის — ასევე, გუგლის კრიტიკას მოიცავს, ჰოულის თქმით, მათ სივრცეში ანტიკონსერვატიული მიკერძოების გამო.

"მაშინ, როდესაც ეს პლატფორმები არჩევნებს განსაზღვრავენ, არასასურველ პოლიტიკურ შეხედულებებს ბლოკავენ, პოლიტიკოსების ჯიბეებს ასობით მილიონი დოლარით ავსებენ, ჩვენს შვილებს კი ეკრანებზე აჯაჭვებენ, მსურს, თანამედროვე ხანის მძარცველი დიდგვაროვნებისაკენ მივაპყრო თქვენი ყურადღება", — განაცხადა ჰოულიმ იმჟამად, — "ეს არის ბრძოლა ამერიკის სახალხო დემოკრატიის აღსადგენად. ამიტომ ვწერ ამ წიგნს".

თუმცა, როგორც ჩანს, სენატორის მიერ დიდგვაროვნებზე დაწერილი წიგნი დღის სინათლეს ვერ იხილავს, ყუაზე დატანებული Simon & Schuster-ის ლოგოთი მაინც. გამომცემლობის განცხადებით, 6 იანვარს ვაშინგტონში განვითარებული მოვლენების გამო, მათ გადაწყვიტეს, აღარ გამოსცენ ჰოულის წიგნი.

"ამ გადაწყვეტილებამდე ადვილად არ მივსულვართ", — აღნიშნულია ოფიციალურ განცხადებაში, — "ჩვენი, როგორც გამომცემლების, მისია ყოველთვის იქნება განსხვავებული ხმისა და შეხედულების გავრცელება, თუმცა, ამავდროულად, როგორც მოქალაქეები, სერიოზულად ვიაზრებთ ჩვენს საზოგადოებრივ პასუხისმგებლობას და ვერ დავუშვებთ, მხარი დავუჭიროთ სენატორ ჰოულის, ჩვენი დემოკრატიისა და თავისუფლებისთვის საფრთხის შექმნაში მონაწილეობის შემდეგ".

გადაწყვეტილებამ, რასაკვირველია, აღაშფოთა სენატორი, რომელიც გამომცემლობას "სასამართლოში შეხვედრის" დათქმით ემუქრება. ჰოულის შეფასებით, ეს ყველაფერი ორუელის აღწერილ რეალობას ემსგავსება, თავად კი არა დადებული კონტრაქტის, არამედ "პირველი კონსტიტუციური შესწორების" დასაცავად იბრძოლებს, რომელიც ქვეყანაში სიტყვის, რწმენისა და პრესის თავისუფლებას განსაზღვრავს.

"ესაა მემარცხენეების ხედვა — ხაზი გადაუსვან ყველას, ვინც არ მოსწონთ. სწორედ ხაზის გადასმის კულტურის წინააღმდეგ ვიბრძოლებ ბოლომდე. სასამართლოში გნახავთ", — წერს ჰოული.

სენატში გამოსვლისას ჰოულიმ, ექვს სხვა ადამიანთან ერთად, ბაიდენის პრეზიდენტად დამტკიცება გააპროტესტა და ცრუდ მიჩნეული ბრალდებები წარმოადგინა, რომელსაც ტრამპი და მისი მხარდამჭერები არჩევნების შემდგომ იმეორებენ. ჰოული ასევე პირველი სენატორი იყო, რომელმაც არჩევნების შედეგები ეჭვქვეშ დააყენა და მათი სიყალბის დამტკიცებას გამუდმებით ცდილობდა მტკიცებულებების წარმოდგენის გარეშე.

გარდა ამისა, გაზეთ The Kansas City Star-ში აღნიშნულია, რომ ჰოულის "ხელები სისხლით აქვს მოსვრილი" კაპიტოლიუმში მომხდარი ამბებით. გამოცემის თქმით, "ჰოულიმ და რესპუბლიკელებმა, რომლებიც სიყალბის გავრცელებით ტრამპის მონეტის გადმოტრიალებას ცდილობდნენ, მთელი ამ ხნის განმავლობაში კარგად იცოდნენ, რომ მათი მტკიცებულებები ცრუ იყო".