აშშ-ის მოქმედი პრეზიდენტის, დონალდ ტრამპის მორიგი პოსტი ფეისბუქისა და ტვიტერის პლატფორმებიდან გაქრა. Twitter-ზე წერია, რომ პოსტები წესების დარღვევის გამო წაიშალა, ფეისბუქზე კი მსგავსი მონიშვნა არ არის. არსებობს შანსი იმისა, რომ პრეზიდენტმა ამ პლატფორმაზე პოსტი თავადვე წაშალა, თუმცა შინაარსიდან გამომდინარე, ჩნდება ვარაუდი, რომ ის FB-ს "სანქციებს" ემსხვერპლა.

ახალ პოსტში, რომელიც ტრამპმა ტვიტერსა და ფეისბუქზე გამოაქვეყნა, მხარდამჭერების საქციელს ამართლებდა. ტრამპი მათ ქცევას "წმინდა გამარჯვების" უცერემონიოდ წართმევით ხსნიდა.

ტრამპის ეს პოსტი, ისევე, როგორც წინა ვიდეომიმართვა ტვიტერმა რისკისშემცველად მონიშნა და ინტერეაქციის ფუნქცია შეუზღუდა. მოგვიანებით კი ორივე მათგანი წაშალა. აღნიშნული ვიდეო აღარც ფეისბუქზე ძებნება.

ვიდეომიმართვაში დემონსტრანტებს, რომელთა ნაწილი კაპიტოლიუმში შეიჭრა, ტრამპმა "განსაკუთრებულები" უწოდა და უთხრა, რომ ისინი უყვარს, რაც ძალადობის წახალისებად შეფასდა.

ვაშინგტონში, კაპიტოლიუმთან მიმდინარე ტრამპის მხარდამჭერების აქცია დაპირისპირებაში გადაიზარდა. დემონსტრანტებმა ბარიერი გაარღვიეს და შენობაში შეიჭრნენ. კონგრესში ევაკუაცია გამოცხადდა, ქალაქში კი კომენდანტის საათი.

შეწყდა სხდომა, რომელზეც არჩევნების შედეგები უნდა დაემტკიცებინათ. სწორედ ამას აპროტესტებდნენ ტრამპის მხარდამჭერები, რადგან მოქმედ პრეზიდენტს სჯერა, რომ მან გაიმარჯვა და არჩევნები გაყალბდა.

ამ ეტაპზე ვრცელდება ინფორმაცია ერთ დაჭრილ მოქალაქესა და რამდენიმე დაშავებულ პოლიციელზე.

გაიგეთ მეტი: