ჩინეთში არ შეუშვეს ჯანდაცვის მსოფლიო ორგანიზაციის სპეციალისტთა ჯგუფი, რომელსაც უხანში COVID-19-ის წარმოშობა უნდა შეესწავლა. როგორც ჯანმოში აცხადებენ, ორი სპეციალისტი უკვე გზაში იყო, როცა ვიზასთან დაკავშირებული პრობლემის გამო ქვეყანაში შესვლის უფლება არ მისცეს.

როგორც BBC წერს, 2019 წელს აღმოჩენილი ვირუსის წარმოშობის გამოკვლევა ჯანდაცვის მსოფლიო ორგანიზაციას პეკინთან შეთანხმებული ჰქონდა.

ჯანმოს ხელმძღვანელი, ტედროს ადანომ გებრეისუსი იმედგაცრუებულია, რომ ჩინეთს სპეციალისტების ჩასვლისთვის ნებართვა გაცემული არ აქვს.

"მე დამარწმუნეს, რომ საერთაშორისო სპეციალისტების სწრაფი ჩასვლისთვის ჩინეთი ყველა შიდა პროცედურას გაამარტივებდა", — განაცხადა მან პრესკონფერენციაზე და დაამატა, რომ ჩინეთის მაღალჩინოსნებთან მუდმივ კონტაქტზეა.

ჯანდაცვის მსოფლიო ორგანიზაცია რამდენიმე თვეა ცდილობს, რომ ჩინეთში 10 სპეციალისტისგან შემდგარი ჯგუფი დაუშვან, რათა მათ ვირუსის ნიმუშები აიღონ, დაადგინონ მისი წარმოშობა და გაარკვიონ როგორ გადაიცემა ის ცხოველისგან ადამიანზე. დეკემბერში ცნობილი იყო, რომ მუშაობა 2021 წლის იანვრიდან დაიწყებოდა.

5 იანვარს ჯგუფის ორი წევრი ჩინეთში გაემგზავრა, თუმცა ერთ-ერთი მათგანი უკან გააბრუნეს, ხოლო მეორე ამ დრომდე მესამე ქვეყანაში იმყოფება.

COVID-19-ის ვირუსი პირველად ჩინეთის ქალაქ უხანში 2019 წლის ბოლოს გამოვლინდა. თავდაპირველი ინფორმაციით, ვირუსის წყარო სავაჭრო ბაზარი იყო, სადაც ეგზოტიკურ ცხოველებს ყიდდნენ და სწორედ აქედან გადაედო ის ადამიანს ცხოველისგან. არსებობს ასევე, ვირუსის ღამურებისგან გადაცემის ვერსიაც. ახალი კორონავირუსის წარმოშობასთან დაკავშირებით არაერთი მოსაზრება გამოითქვა. ზოგიერთი სპეციალისტი მიიჩნევს, რომ ეგზოტიკური ცხოველების ბაზარი ვირუსის გამააქტიურებელი იყო და არა — წყარო.