საქართველოს ფინანსთა სამინისტროს საგამოძიებო სამსახურის განცხადებით, საქართველოს მასშტაბით სხვადასხვა აფთიაქების ხელმძღვანელი პირების მიერ განხორციელებული, უკანონო სამეწარმეო საქმიანობის არაერთი ფაქტი გამოავლინდა.

გამოძიების ვერსიით, დიდი ოდენობით შემოსავლების მიღების მიზნით, საქართველოში მდებარე 21 სააფთიაქო დაწესებულებიდან მოქალაქეებზე, მათ შორის არასრულწლოვან პირებზე, სისტემატიურად გაიცემოდა ფსიქოტროპული და სპეციალურ კონტროლს დაქვემდებარებული მედიკამენტები რეცეპტის გარეშე.

უწყების განცხადებით, დანაშაულებრივი საქმიანობის განმახორციელებელი პირები ხელს უწყობდნენ ე. წ. სააფთიაქო ნარკომანიას.

საგამოძიებო სამსახურის განცხადებით, ჩხრეკის შედეგად, ამოიღეს ფსიქოტროპული და სპეციალურ კონტროლს დაქვემდებარებული მედიკამენტების ქვეყანაში ლეგალურ ბრუნვასთან დაკავშირებული დოკუმენტაცია.

საქმეზე გრძელდება გამოძიება საქართველოს სისხლის სამართლის კოდექსის 192-ე მუხლის პირველი ნაწილით, დანაშაული, სასჯელის სახით, ითვალისწინებს თავისუფლების აღკვეთას, ვადით, 1 დან 3 წლამდე.