ქართული ოცნების დეპუტატმა, დიმიტრი ხუნდაძემ განაცხადა, რომ ოჯახში ძალადობა ემოციურ ფონზეც ხდება და ამნისტიის შესახებ კანონპროექტში ეს გათვალისწინებული უნდა იყოს.

"ძალიან ბევრ ოჯახთან მქონია საუბარი და მათი ნათქვამი მოვიტანე. არა მხოლოდ მათი ნათქვამი, ჩემი აზრიც ემთხვევა მათსას, ამიტომ, ვთვლი ვალდებულად თავს, რომ ამაში უფრო აქტიური მონაწილეობა მივიღო. არის ემოციურ ფონზე წარმოშობილი კონფლიქტები, რა თქმა უნდა, დამდგარ შედეგს გამართლება არ აქვს, მაგრამ ვფიქრობ, არ იქნებოდა ურიგო, ამ საკითხთან დაკავშირებით რაღაც ნაწილი გაგვეთვალისწინებინა. პირველ რიგში გათვალისწინება სოციალური ფონის, როცა ყველა ოჯახს დამატებითი ტვირთი აქვს. ოჯახები არის გახლეჩილი. აქ არის ბევრი პრობლემა, ოჯახს ეკონომიურად უჭირს და ოჯახის უფროსები (უფრო ხშირად ოჯახის უფროსია ამის ჩამდენი) არათუ ეხმარებიან ოჯახს, არამედ ტვირთად აწვებიან და მათი მორალური და ეკონომიური მხარეც ძალიან მძიმე და შეუსაბამო ხდება ამ რეალობაში. მე არ ვამბობ, რომ ხელაღებით, სრული ამნისტირება მოვახდინოთ ამ დანაშაულის", — განაცხადა დიმიტრი ხუნდაძემ.

ხუნდაძემ განმარტა, რა შემთხვევაში უნდა შეეხოს ამნისტია ოჯახში ძალადობაში ბრალდებულ პირებს.

"თუ ადამიანმა ეს ემოციურ ფონზე ჩაიდინა (რა თქმა უნდა, გამართლება შორსაა ამისგან), თუ დახასიათება ისეთია, რომ რისკები მინიმალურ დონეზე იქნას აღქმული, ოჯახიც თანახმაა, ამ სოციალურ ვითარებაში, მე ვფიქრობ, ეს იქნებოდა არა მხოლოდ კარგი, არამედ ძალიან კარგი და აუცილებელიც", — აღნიშნა დიმიტრი ხუნდაძემ.

ასევე, ხუნდაძემ განმარტა, რომ თუ ძალადობის შემთხვევა არის მეორე ან მესამე, პირიქით, უკვე აღარ უნდა გაითვალისწინონ ოჯახის თანხმობა, რადგან ციხიდან გამოსულ მოძალადეს, შესაძლოა, პირიქით, ისევ სამაგიეროს გადახდის სურვილი გაუჩნდეს. ამიტომ ამ ტიპის მოძალადეებს ამნისტია არ უნდა შეეხოთ.

2 კვირის წინ პარლამენტში დააინიცირეს საქართველოს კანონის პროექტი ამნისტიის შესახებ, რომლის მიხედვითაც ამინისტია შეეხება სულ 44 მუხლით გათვალისწინებულ დანაშაულს. ამ დროისთვის კანონპროექტი არ მოიცავს ისეთ მძიმე მუხლებს, როგორიცაა მკვლელობა, ოჯახში ძალადობა და ასე შემდეგ.

ასევე, კანონპროექტი ითვალისწინებს იმ პირთა განთავისუფლებას სისხლის სამართლის პასუხისმგებლობისგან და შესაბამისი სასჯელისგან, რომელთაც 2020 წლის 11 დეკემბრამდე ჩაიდინეს ამ კანონპროექტით გათვალისწინებული ცალკეული დანაშაული.

საქართველოს შინაგან საქმეთა სამინისტროს სტატისტიკის მიხედვით, 2020 წლის პირველ ექვს თვეში ოჯახში ძალადობის 2 607 შემთხვევა მოხდა, მათ შორის 11 მკვლელობით დასრულდა. 15 ივლისამდე პერიოდში 5 304 შემაკავებელი ორდერი გამოწერა.

ოჯახში ძალადობა არ გულისხმობს მხოლოდ ფიზიკურ შეხებას. ოჯახის წევრის მხრიდან ფსიქოლოგიური ზეწოლა, მუქარა, შანტაჟი, სიტყვიერი შეურაცხყოფა ასევე ოჯახში ძალადობაა და კანონით აკრძალულია.

ოჯახში ძალადობის შემთხვევაში პოლიციის გამოძახება შესაძლებელია 112-ზე დარეკვით. ზარი უფასოა. საკონსულტაციო მომსახურების გაწევის მიზნით ფუნქციონირებს ცხელი ხაზი: 116 006. შესაძლებელია 112-ის აპლიკაციის გადმოწერაც, სადაც ღილაკზე SOS დაჭერით პოლიციასთან შეტყობინება შევა და სამართალდამცველები ლოკაციის მიხედვით გიპოვიან. აღსანიშნავია ისიც, რომ არსებობს არაერთი არასამთავრობო ორგანიზაცია, რომლებიც ოჯახში ძალადობის მსხვერპლებს სხვადასხვა ტიპის დახმარებას უფასოდ სთავაზობენ.