ქართული ოცნების აღმასრულებელმა მდივანი, ირაკლი კობახიძე ფიქრობს, რომ ნაციონალური მოძრაობის თავმჯდომარეს, ნიკა მელიას, ინტერესის გამო მაინც უნდა მიეღო მონაწილეობა არჩევნების მეორე ტურში. კობახიძემ განაცხადა, რომ პირველი ტურის შედეგებიდან გამომდინარე, მელიას გამარჯვების შანსი ჰქონდა.

"რაღაცა ელემენტარული პოლიტიკური ცდუნება მაინც ხომ უნდა გქონდეს. იგივე მელიაზე გაიხსენეთ თქვენ ჩემი გამონათქვამი, ვამბობდი, რომ თუ მელია მოიგებდა არჩევნებს და გახდებოდა გლდანის მაჟორიტარი, მე მივდიოდი [პოლიტიკიდან]. პატარა ცდუნება მაინც ხომ უნდა გქონდეს და ვაჟკაცობა და აზარტი, რომ ... აი, მიეღო მეორე ტურში მონაწილეობა, თუნდაც რაღაცა ინტერესის გამო. გარკვეული შანსები ჰქონდა. მე დარწმუნებული ვიყავი გამარჯვებაში, მაგრამ, უიმედო არ იყო მისი მდგომაროება, გამომდინარე პირველი ტურის მონაცემებიდან. ესეც ვერ გაბედა და ვერ გარისკა", — განაცხადა კობახიძემ POSTV-ს ეთერში.

მისი თქმით, ნაციონალური მოძრაობის წევრები მხდალები არიან, რის გამოც, ვერასდროს მიაღწევენ წარმატებას პოლიტიკაში.

"ეს არის მათი ბუნება. მხდალები არიან ისინი რეალურად და ეს არის პოლიტიკაში ძალიან დიდი სისუსტე და ამიტომ, ეს არის მთავარი მიზეზი, რატომაც ეს პოლიტიკური ძალა ვერასდროს ვერ მოახერხებს წარმატების მიღწევას და ხელისუფლებაში დაბრუნება, ამაზე საერთოდ ლაპარაკი ზედმეტია", — განაცხადა ირაკლი კობახიძემ.

არჩევნებამდე რამდენიმე დღით ადრე, ირაკლი კობახიძემ განაცხადა, რომ თუ მმართველი პარტიის სამი კანდიდატი, გლდანის, სამგორისა და თელავის ოლქებში არჩევნებს ვერ მოიგებდა, იგი პოლიტიკიდან წავიდოდა.

გლდანის მაჟორიტარულ ოლქში, ნიკა მელიას კონკურენტი ქართული ოცნებიდან ლევან კობიაშვილი იყო. პირველი ტურის შედეგები ასე გადანაწილდა: მელია — 43,88%, კობიაშვილი — 42,69%. არჩევნების მეორე ტურში არც ერთ ოპოზიციონერ კანდიდატს მონაწილეობა არ მიუღია. ისინი არჩევნების შედეგებს არალეგიტიმურს უწოდებენ და როგორც მაჟორიტარული ოლქების მეორე ტურში მონაწილეობაზე, ისე პროპორციული სიით მიღებულ მანდატებზე უარი თქვეს.

გაიგეთ მეტი: