ბრიტანელმა წყვილმა, რომელსაც ექიმებმა უთხრეს, რომ მათი ნაადრევად დაბადებული ბავშვი ვერ იცოცხლებდა, შობა ერთი წლის შვილთან ერთად აღნიშნა.

აირისი 2019 წლის 21 ნოემბერს დაიბადა. ამ დროისათვის იგი მხოლოდ 28 კვირის იყო, თუმცა პლაცენტის მოცილების შემდეგ, რის გამოც მას ჟანგბადისა და საკვების მიწოდება შეუწყდა, ნაადრევი მშობიარობა გახდა საჭირო.

ექიმები ახალშობილის გადარჩენას არ ელოდებოდნენ; მეტიც, ისინი მთელი ერთი თვის განმავლობაში გამუდმებით იმეორებდნენ, რომ აირისი ვერ გადარჩებოდა. თუმცა, მებრძოლმა გოგომ ყველას საპირისპირო დაუმტკიცა — ცოტა ხნის წინ იგი ერთი წლის გახდა და ამაყ მშობლებთან ერთად შობის დღესასწაულიც აღნიშნა.

"მეგონა, მშობიარობის შემდგომი ჩვეულებრივი ამბებისთვის ვიყავი მზად, რადგან ნაადრევი მშობიარობა აქამდეც გამომიცდია, თუმცა, როგორც აღმოჩნდა, არ ვყოფილვარ", — ამბობს აირისის დედა, 42 წლის ემა გრიფინი, — "ეს ამბები ყველაზე გრძელ და რთულ მოგზაურობად გაიწელა. როცა ექიმებმა გვითხრეს, რომ 'იგი ვერ იცოცხლებს', ჩვენ უიმედობამ შეგვიპყრო".

ფოტო: Caters News

ემა დასძენს, რომ აირისს ინფექციაც შეეყარა, რომლის "მართვაც ექიმებს არ შეეძლოთ".

"მთელი ოთხი კვირის განმავლობაში მხოლოდ იმას გვეუბნებოდნენ, რომ იგი დაიღუპებოდა. ერთი და იმავე სიტყვების მოსმენით განადგურებული ვიყავი. ისე ჩანდა, თითქოს ყველანაირი იმედი გადამიწურეს", — იხსენებს ემა, — "ვეცადეთ, ძალიან დიდი მოლოდინები არ შემქმნოდა და საკუთარი თავი ყველაზე უარესისთვის მომემზადებინა, თუმცა, ამავდროულად, იმედის ნაპერწკალს ვეჭიდებოდით. მხოლოდ ის გვსურდა, ჩვენი შვილი სახლში წაგვეყვანა და მისთვის მშობლობის გაწევის შესაძლებლობა მოგვცემოდა.

"ვერც გვეძინა და ვერც ვჭამდით. ღამეების უმეტესობას ტირილსა და ტელეფონის დარეკვის მოლოდინში ვატარებდით. აირისზე ჩემი ორსულობა მაღალი რისკის მქონედ იყო შეფასებული, რადგან, სამწუხაროდ, გასული წლის თებერვალში ბავშვი გამიჩნდა, მონტი, 29 კვირის იყო და მხოლოდ 57 წამი იცოცხლა, რადგან წყალმანკით იტანჯებოდა".

ემას თქმით, მას და მის ქმარს, სკოტს, წინა ქორწინებებიდან შვილები ჰყავთ, თუმცა მათი ასაკის გათვალისწინებით, სურდათ, საერთო შვილიც დროულად ჰყოლოდათ.

მებრძოლ აირისს სიცოცხლის პირველ თვეებში არაერთი სირთულის გადალახვა მოუხდა. ორი კვირის ასაკში, მას პნევმონია დაემართა, თუმცა დაამარცხა. მომდევნო კვირებში სიტუაცია გამოსწორდა, გოგო კი იმდენად მოძლიერდა, რომ ინკუბატორის დასატოვებლადაც მზად იყო.

თუმცა, გასული წლის შობის წინა დღეს, როცა მშობლებმა იფიქრეს, რომ პატარას საფრთხე აღარ ემუქრებოდა, მათ ინკუბატორიდან დაურეკეს და უთხრეს, რომ აირისის მდგომარეობა გაუარესდა. ინფექციის მარკერების რაოდენობა 500-ს აღწევდა.

"ამ დროს მართლა ვიფიქრეთ, რომ ჩვენს შვილს ვკარგავდით. ყოველ შემდგომ დილას, როცა საავადმყოფოში მივდიოდით, ექიმები გვეგებებოდნენ და გვამცნობდნენ, რომ აირისი ამას ვერ გადაიტანდა", — ამბობს ემა.

ემას და სკოტის შიშები კიდევ უფრო გამძაფრდა, როცა ექიმები მკურნალობის გაგრძელების შესახებ გადაწყვეტილების მისაღებად შეიკრიბნენ. ემას თქმით, ამ დროს მას გული ეწურებოდა და თრთოლავდა, თუმცა, საბედნიეროდ, მედიკოსებმა აირისისთვის მკურნალობის გაგრძელება არჩიეს.

პატარა გოგოს ცხოვრება არც მომდევნო თვებში იყო უკეთესი. ერთხანს მას გულიც კი გაუჩერდა, თუმცა ბრძოლა არ შეუწყვეტია და აპრილის მიწურულს ოჯახთან ერთად პირველად მივიდა საკუთარ სახლში.

ფოტო: Caters News

ფოტო: Caters News

"წარმოუდგენლად ვამაყობთ მისით", — ამბობს ემა, — "ჟანგბადსაც თავისით ისუნთქავს და ისეთ რამეებს სჩადის, რასაც ექიმები ვარაუდობდნენ, რომ ვერასდროს შეძლებდა. აქეთ-იქით დაგორავს და წამოდგომას ცდილობს. უკვე თქვა 'დადაც', თუმცა, მგონი, სიარული გაუჭირდება. მიუხედავად ამისა, იგი ძალიან ძლიერია, ჩვენ კი მისი სახლში ყოფნით ვართ მადლიერები".