ახალდამტკიცებული პრემიერმინისტრის, გიორგი გახარიას განცხადებით, სამინისტროების გაერთიანება შეცდომა იყო, რომლის გამოსწორებასაც აპირებენ. მისი თქმით, კულტურის სფეროს წარმომადგენლებს სჭირდებათ ცალკე ჩამოყალიბებული სამინისტრო.

"ჩვენ ხომ ადამიანები ვართ. შეიძლება შეცდომა დაუშვა, მაგრამ ის შეცდომა უნდა გამოასწორო. რეალურად, ამ 2 წლის განმავლობაში, განსაკუთრებით დღეს, როდესაც რთული ვითარებაა, კულტურის სფეროს წარმომადგენლები მართლაც საჭიროებენ ცალკე ჩამოყალიბებულ სამინისტროს. კიდევ ერთი რამ არის, ჩვენი კულტურა და კულტურული მემკვიდრეობა, საერთოდ, არის შეუფასებელი. შესაბამისად, ჩვენ ყველას კარგად უნდა გვესმოდეს, რომ არის ცალკე სამინისტრო საჭირო, რომ როგორც კულტურის განვითარება მოხდეს, ასევე, მოხდეს კულტურის შემდგომი კომერციალიზაცია", — განაცხადა მან.

გარდა ამისა, გახარიამ აღნიშნა, რომ სპორტზე გადაწყვეტილება არაერთგვაროვანია, რამდენიმე მიზეზის გამო. მისი თქმით, სპორტის სამინისტრო ან დარჩება განათლების სამინისტროში, ან კულტურის სამინისტროსთან ერთად გამოეყოფა ცალკე. მისივე თქმით, ცალკე სპორტის სამინისტროს ჩამოყალიბებ არ განიხილება.

"პირველი — მასობრივი სპორტი, რაც არის დღეს ჩვენი ქვეყნის გამოწვევა. ბევრად უფრო ახლოს არის განათლების სამინისტროსთან, რადგან მასობრივი სპორტის ბირთვი არის სასკოლო განათლება. მეორე — პროფესიული, მაღალი მაჩვენებლების სპორტზე თუ ვსაუბრობთ, იქ სტრუქტურა სხვანაირად არის მოწყობილი და ყველგან არის ფედერაციები, რომლებსაც სახელმწიფო ბიუჯეტს უფინანსებს და მათ გადაწყვეტილების მიღებისა და მართვის საკმაოდ დიდი ავტონომიები აქვთ. ამიტომ, ცოტა სხვადასხვა სფეროა", — განაცხადა მან.