საკონსტიტუციო სასამართლომ მოსარჩელე კონსტანტინე გამსახურდიას კონსტიტუციური სარჩელი დააკმაყოფილა და არაკონსტიტუციურად ცნო ნორმა, რაც პროკურორს დაზარალებულისათვის სისხლის სამართლის საქმის მასალების ასლების მიღების შესაძლებლობას უკრძალავდა. მოსარჩელის ინტერესებს ამ საქმეში საქართველოს ახალგაზრდა იურისტთა ასოციაცია (საია) იცავდა.

საიაში განმარტავენ, რომ გადაწყვეტილების მიღებამდე დაზარალებულს საქმის მასალებს პროკურატურაში ან საგამოძიებო ორგანოში შესაბამისი პროკურორის ან გამომძიებლის ზედამხედველობის ქვეშ აცნობდნენ. დაზარალებულს პროკურატურიდან სისხლის სამართლის საქმის ასლები წაღებისა და მათი სხვა ადგილას გაცნობის უფლება, საჯარო მოხელეების ზედამხედველობის გარეშე, არ ჰქონდა.

"საკონსტიტუციო სასამართლომ ეს აკრძალვა არაკონსტიტუციურად სცნო, ვინაიდან დაზარალებულს არ ჰქონდა ასლების მიღების შესაძლებლობა მაშინაც კი, როცა ამით ზიანი არ მიადგებოდა გამოძიების ინტერესებს, ასევე, ასლების მიღებით სხვა ადამიანის პირადი ცხოვრების გასაჯაროების შესაძლებლობა არ მოხდებოდა. დაზარალებულს ბლანკეტურად, ყველა შემთხვევაში სისხლის სამართლის საქმის მასალების მიღების შესაძლებლობა ერთმეოდა. საკონსტიტუციო სასამართლომ პარალმენტს მიანდო იმ საკითხის გადაწყვეტა, თუ ვის უნდა დაეკისროს სისხლის სამართლის საქმის მასალების ასლების გადაღების ხარჯები: დაზარალებულს თუ სახელმწიფოს", — აცხადებენ საიაში.

საქართველოს კონსტიტუციის მე-18 მუხლის მე-2 პუნქტით გარანტირებულია ყველა ადამიანის უფლება, საჯარო დაწესებულებაში მასზე არსებულ ინფორმაციას გაეცნოს.

საიაში აცხადებენ, რომ საკონსტიტუციო სასამართლომ ამ საქმეში სწორედ აღნიშნული კონსტიტუციური დებულების დარღვევა დაადგინა, ვინაიდან დანაშაულის შედეგად დაზარალებულ პირს მის შესახებ პროკურატურასა და საგამოძიებო ორგანოში დაცული ინფორმაციის ასლის სახით მიღების შესაძლებლობა არ ჰქონდა.