ერთიანი ნაციონალური მოძრაობის ერთ-ერთი ლიდერის, ხატია დეკანოიძის განცხადებით, ის, რაც აფრიკის დასახლებაში ხდება, არის უკანონობა და განუკითხაობა.

"პირდაპირ ამ სიტყვის მნიშვნელობით უბრალოდ გამოათრიეს ეს ხალხი, მაშინ როდესაც ქართული ოცნება ჰპირდებოდა მათ, რომ ყველას დაუკანონებდნენ თავიდან ბოლომდე. მათ შორის, იგივე მდგომარეობაა ჩემს ყოფილ სამაჟორიტარო ოლქში, ისანში, როდესაც ხალხს ჰპირდებიან დაკანონებას და არჩევნების შემდეგ ყურადღებას არ აქცევენ. ეს არის უკანონობა, განუკითხაობა, რომელიც აქ ხდება. წინასაახალწლოდ, ამ პანდემიაში, უმძიმეს პირობებში ადამიანების ბედის ანაბარად დაგდება, მაშინ, როდესაც ივანიშვილის პანორამა თბილის ყოველგვარი სამართლებრივი ჩარჩოს გარეშე ააშენეს. ივანიშვილისთვის შეიძლება ყველაფერი და უბრალო ადამიანებისთვის არაფერი", — აცხადებს დეკანოიძე.

თბილისში, აფრიკის დასახლებაში მერიის ზედამხედველობის სამსახური იქ არსებული შენობა-ნაგებობების დემონტაჟს ცდილობს. მოსახლეობა ცდილობს, შეეწინააღმდეგოს და დანგრევაში ხელი შეუშალოს. ადგილზე მობილიზებულია პოლიცია. დაკავებულია რამდენიმე პირი.