ევროპული საქართველოს ერთ-ერთი ლიდერი, ელენე ხოშტარია აცხადებს, რომ აფრიკის დასახელებაში პოლიციის ქმედება ცხოველურ და არაადამიანურია. იგი ამჟამად ადგილზე იმყოფება.

"პირველ რიგში, ეს არის სრული არაადამიანობა. პანდემიის დროს, წარმოუდგენელია, რაც ხდება. ჯარი არის მოსული ამ პოლიციელების, ჩვეულებრივი მონების. არაფერს არ ეუბნებიან, ჩვეულებრივად იჭერენ ადამიანებს და უნგრევენ სახლებს. რაც შეეხება უკანონობას და ამაზე აპელირებას, უკანონობა გაიხსენონ, თაბორის მთა რომ აჩუქეს ივანიშვილს ერთ ლარად. არ არსებობს კანონი, ეს არის უბრალოდ არაადამიანობა, ეს არის ცხოველური და არაადამიანური მოპყრობა. ტალახში ზელენ ადამიანებს და ისე აკავებენ", — ამბობს ხოშტარია TV პირველთან საუბარში.

თბილისში, აფრიკის დასახლებაში მერიის ზედამხედველობის სამსახური იქ არსებული შენობა-ნაგებობების დემონტაჟს ცდილობს. მოსახლეობა ცდილობს, შეეწინააღმდეგოს და დანგრევაში ხელი შეუშალოს. ადგილზე მობილიზებულია პოლიცია. დაკავებულია რამდენიმე პირი.