დედაქალაქის მერის, კახა კალაძის განცხადებით, მძიმე სოციალური და ეკონომიკური სიტუაცია ქვეყანაში არ ნიშნავს იმას, რომ "ყველანაირი უკანონობა იყოს დაშვებული". ამის შესახებ მერმა რუსთავი 2-ის ეთერში ისაუბრა.

"ეს ხომ არ ნიშნავს იმას, რომ მძიმე სოციალური მდგომარეობა გვაქვს, მძიმეა ეპიდემიოლოგიური მდგომარეობა და ყველაფერი უკანონობა უნდა იყოს დაშვებული. ეს მიდგომა და დამოკიდებულება კატეგორიულად მიუღებელია. ძალიან ვწუხვარ და ცუდია, რომ ქვეყანაში სოციალური ფონი მძიმეა, თუმცა ეს არ ნიშნავს იმას, რომ ადამიანები უკანონობის ჩადენაში წავახალისოთ. რას ვეუბნებით იმ ოჯახებს, ვისაც 300-400-500 ლარის მითვისებაზე კანონის სრული სიმკაცრით ვუდგებით?", — აცხადებს კალაძე.

დღეს თბილისის მერიამ სამგორის რაიონში, აფრიკის დასახლებაში უკანონო შენობების დემონტაჟი დაიწყო. მათი ინფორმაციით, სახელმწიფოს საკუთრებაში არსებულ მიწის ნაკვეთზე, სამშენებლო სამართალდარღვევის 12 ფაქტი გამოვლინდა. ტერიტორიაზე სპეციალური ტექნიკის შეყვანას მოსახლეობის პროტესტი მოჰყვა, ადგილზე რამდენიმე საათის განმავლობაში მობილიზებული იყო პოლიციაც. იყო პოლიციასა და მოქალაქეებს შორის დაპირისპირების რამდენიმე შემთხვევა. შსს-ს ინფორმაციით, დაკავებულია 8 ადამიანი.

აფრიკის დასახლებაში მიმდინარე პროცესებზე საუბრისას, თბილისის მერმა, კახა კალაძემ განაცხადა, რომ იქ გამოსულ მოსახლეობას აქვს სახლები და მიწები და ისინი მიზანმიმართულად ცდილობენ მიწების დატაცებს.

ამავე თემაზე: