2017 წლის 16 იანვრიდან რვა ტელეკომპანიის სარეკლამო დროს ერთი კომპანია - შპს ინტერ მედია ყიდის. აღნიშნული სარეკლამო კომპანია რვა ტელევიზიიდან ექვსი ტელევიზიის - რუსთავი 2, იმედი, მაესტრო, GDS, მარაო და კომედი არხი - სარეკლამო დროს სრულად ყიდის, ტვ პირველისა და კავკასიის შემთხვევაში კი - ნაწილობრივ.

სარეკლამო დროის გასაყიდად ახალი კომპანია - შპს ინტერ მედია საჯარო რეესტრში 2016 წლის 15 დეკემბერს დარეგისტრირდა. კომპანიის მფლობელები ირაკლი ბურძგლა (32,5%), ზურაბ (ზუკა) გუმბარიძე (32,5%), გიორგი ბარკალაია (15%) და მანანა დოიაშვილი (20%) არიან. მფლობელებს შორის ბურძგლასა და გუმბარიძეს სარეკლამო დროის გაყიდვის გამოცდილება აქვთ. ბურძგლა ჯენერალ მედიას დირექტორი იყო, რომელიც იმედისა და რუსთავი 2-ის სარეკლამო დროს 2012 წლამდე ყიდდა. გუმბარიძე კი, შპს ინტერ მედია პლუსში მუშაობდა, რომელიც ბოლო წლებში რუსთავი 2-ის, მარაოსა და კომედი არხის სარეკლამო დროს ყიდდა.

როგორც შპს ინტერ მედიას ერთ-ერთმა მფლობელმა, ზურაბ (ზუკა) გუმბარიძემ On.ge-ს უთხრა, ახალ კომპანიაში შპს ინტერ მედია პლუსსა და ტელეკომპანია იმედის გაყიდვების სამსახურში დასაქმებული ადამიანები მუშაობენ.

„არცერთი ტელეკომპანია არცერთის სარეკლამო დროს არ ყიდულობს. სარეკლამო კომპანია ყიდულობს მათგან დროს,“ - განმარტა გუმბარიძემ.

მას ამ ეტაპზე უჭირს თქვას, სარეკლამო ბაზრის რა ნაწილს მიიღებს კომპანია, რომელიც რვა ტელეკომპანიის სარეკლამო დროს გაყიდის.

„ცოტა რთული სათქმელია, ბაზარი არის რთულ მდგომარეობაში, ბოლო რამდენიმე წლის განმავლობაშ ყოველ წელს მცირდებოდა. რა გადანაწილებას მივიღებთ, ამაზე მინიმუმ ერთი კვარტლის შემდეგ უნდა ვისაუბროთ,“ - აღნიშნავს სარეკლამო კომპანიის ერთ-ერთი დამფუძნებელი.

გუმბარიძე არ აკონკრეტებს, რა ფინანსურ სარგებელს მიიღებს თითოეული არხი, რომლის სარეკლამო დროსაც გაყიდიან. On.ge-მ სცადა რუსთავი 2-სა და იმედის გენერალურ დირექტორებთან დაკავშირება, თუმცა უშედეგოდ.

როგორც გუმბარიძე ამბობს, ტელეკომპანიების წარმომადგენლები ვერ შეთანხმდნენ, რომელი რეიტინგების მზომავი კომპანიით უნდა გაიყიდოს სარეკლამო დრო. ამ ეტაპზე რუსთავი 2-ის, მარაოს, კომედი არხის, ტვ პირველისა და კავკასიის სარეკლამო დრო კვლავ TV MR საქართველოს რეიტინგებით იყიდება, ტელეკომპანიების - იმედის, მაესტროსა და GDS-ის დრო კი - შპს ტრი მედია ინტელიჯენსის რეიტინგებით.

ახალი კომპანიის დაარსებამდე, შპს ინტერ მედია პლუსი ტელეკომპანიების რუსთავი 2-ის, მარაოსა და კომედი არხის სარეკლამო დროს სრულად ყიდდა, ტვ პირველისა და კავკასიის სარეკლამო დროს კი - ნაწილობრივ. ტელეკომპანია იმედი კი, მაესტროს და GDS-ის სარეკლამო დროს ყიდდა.