პარტია ერთიანი ნაციონალური მოძრაობის თავმჯდომარე, გრიგოლ ვაშაძე აცხადებს, რომ შეუძლებელია, აღშფოთებას არ იწვევდეს ქვეყნის სტრატეგიული მოკავშირეების დიპლომატიური მისიების ხელმძღვანელებზე თავდასხმა. ვაშაძემ ამის შესახებ Facebook-ზე დაწერა, სადაც ენმ-დან წასვლის მიზეზებზე ისაუბრა. მისი თქმით, გაუგებარია, ვინ და რა მიზნით წამოიწყო ეს კამპანია ელჩების წინააღმდეგ. სავარაუდოდ, გრიგოლ ვაშაძე განცხადების ამ ნაწილით მთავარი არხის დირექტორს, ნიკა გვარამიას ეხმაურება, რომელმაც ელჩები გააკრიტიკა.

"შეუძლებელია ღრმა აღშფოთებას არ იწვევდეს ჩვენი სტრატეგიული მოკავშირეების დიპლომატიური მისიების ხელმძღვანელთა წინააღმდეგ გაჩაღებული თავდასხმებისა და შეურაცხყოფის კამპანია, რომელიც გაუგებარია ვინ და რა მიზნით წამოიწყო. ამით ადგება უდიდესი ზიანი საქართველოს ურთიერთობებს აშშ-სთან, ევროკავშირთან და ევროკავშირის წევრ სახელმწიფოებთან.

იქმნება შთაბეჭდილება, თითქოს ამ კამპანიის მონაწილეებს არასდროს გაუგით, რომ ელჩზე თავდასხმა იგივეა, რაც თავდასხმა იმ სახელმწიფოზე, რომელსაც ის წარმოადგენს, და რომელიც დამოუკიდებლობის აღდგენის დღიდან საქართველოს მოქალაქესთან ერთად ჩვენი სახელმწიფოს და ტერიტორიული მთლიანობის სადარაჯოზე სდგას.
ბოდიშს ვუხდი ჩვენ მეგობრებს!", — წერს ვაშაძე.

მისივე თქმით, არ ეთანხმება პარტიის ხელმძღვანელობის უმრავლესობის მიერ პარტიის სხვა წევრებთან კონსულტაციის გარეშე არჩეულ ტაქტიკას. თუმცა, ვაშაძე არ აკონკრეტებს, რას გულისხმობს და არის თუ არა ეს პარლამენტში არშესვლის გადაწყვეტილება. ამასთან, მისივე თქმით, ვერ შეეგუება იმას, რომ "პარტიის გარშემო და მის შიგნითაც გამოჩნდენ ისეთი ოდიოზური ფიგურები, რომლებიც ჩვენ კარგა ხანია თითქოს და ჩავაბარეთ წარსულს, და რომლებთან ერთად ვერასადროს, ვიმეორებ, ვერასდროს ვერ მოვიპოვებთ ამომრჩევლის ნდობას".

ვაშაძე აღნიშნავს, რომ პირად საუბრებში პრობლემებზე პარტიის სხვა წევრებიც მიუთითებენ

"პრობლემა მდგომარეობს იმაში, რომ მე არ შემიძლია ვიყო იქ, სადაც ვერ ვხედავ შეცდომებზე სწავლის შესაძლებლობას და სურვილს", — აღნიშნავს ის.